Congreso #INLUGO

A Deputación de Lugo presentou o I Congreso de Cultura Dixital e Redes Sociais InLugo, un encontro que reunirá a elite de Internet na capital lucense os días 7 e 8 de xuño, situando á provincia luguesa á vangarda en materia de coñecemento e formación no ámbito dixital. Máis de 30 recoñecidos profesionais en España, de sectores como o xornalismo, turismo, tecnoloxía, emprego, marketing online ou acción social, cuxos blogs e redes sociais contan con miles de seguidores, compartirán nesta cita o seu coñecemento a través de varias ponencias e debates, nos que abordarán os cambios nos hábitos, mentalidades, formas de comunicación e estilos de vida que está provocando Internet na sociedade.

Tamén haberá espazo para a innovación e o emprendemento, coa presentación de proxectos nos que se empregan as redes sociais como medio de expresión e negocio, ou cunha mesa redonda na que se abordará como a Rede pode impulsar empresas ou produtos. Como colofón, este pioneiro encontro acollerá a entrega dos Premios INLUGO, cos que a Deputación recoñecerá o labor que están a realizar empresas lucenses no ámbito dixital.

Xa se adiantou o nome dalgúns dos expertos nacionais que se darán cita en Lugo o 7 e 8 de xuño. Entre eles atópanse: Mario Tascón, especialista en medios dixitais e redes sociais, así como ex director de elmundo.es e elpais.com; Sebastián Muriel, responsable de expansión internacional de Tuenti e ex director de Red.es (organismo estatal encargado do fomento de Internet e novas tecnoloxías); Óscar Reboiras, licenciado en periodismo e responsable do departamento de comunicación do operador galego de telecomunicacións R; Francisco Polo, un dos puntais do activismo na Rede, fundador de Actuable e director de comunicación de Change.org; Javier Pedreira (más coñecido como Wicho) fundador e autor de Microsiervos, o blog español máis popular da historia, ou Alfonso Alcántara (Yoriento), especialista en persoal branding, motivación e emprego 2.0.

Trátase dun encontro totalmente gratuito e para todos os públicos, cun primeiro aforo limitado de 160 persoas, que é a capacidade do Salón de Actos do Pazo Provincial, e un segundo aforo doutras tantas que o seguirá en directo dende o Salón de Pleno da Deputación. Por este motivo, é necesario a previa inscrición neste congreso. Para a participación, respectarase rigorosamente a orde de entrada das inscricións. Ademais, todos os interesados poderán seguir as actividades deste pioneiro Congreso a través de Internet grazas á colaboración dos profesionais da Fundación TIC, que se encargarán da súa emisión en streaming.

As persoas interesadas poderán formular a súa solicitude a partires deste martes, 21 de maio, na páxina web www.inlugo.com ou ben en www.deputacionlugo.org.

Nova Secretaria Xeral das XSG

Nas Xuventudes Socialistas de Galicia contamos dende este sábado cunha nova Secretaria Xeral, ao celebrarse o XIII Congreso Nacional das XSG. Logo do informe de xestión e dun total de 22 intervencións, na sesión vespertina do sábado foi presentada e votada e apoiada maioritariamente a candidatura da compañeira María Torres.

María é membro da Executiva saínte, ocupará durante os vindeiros catro anos ó máximo cargo dentro da organización, tarefa que asume "con ilusión, e coa responsabilidade de saber que aínda queda moito traballo por facer". A nova Secretaria Xeral púxose a disposición de todas e cada unha das agrupacións locais de Xuventudes Socialistas de Galicia para lograr que dende a máis pequena ata a máis numerosa forme parte deste proxecto, porque como dixo,"sen dúbida, os militantes sodes a peza clave que lle dá sentido ás XSG".

Dende que coñecín o proxecto que ten María para as XSG mostreille todo o meu apoio, porque é un proxecto de futuro e realista, que fará que as XSG continuemos avanzando. E aínda que hai quen prefire a frase "sexamos realistas e fagamos o imposible", para min o imposible por definición non é posible, así que prefiro ser realista e facer o posible, que é traballar para seguir facendo realidade que as XSG sigan sendo un referente para a mocidade galega.

Quero felicitar aos compañeiros e compañeiras que entramos nos distintos órganos das XSG, na Executiva Nacional das XSG, no Comité Federal, no Comité de Garantías e no Comité Nacional do PSdeG-PSOE. Pola miña parte como delegado das XSG no Comité Nacional do PSdeG-PSOE, quero agradecerlle a María que contara comigo para asumir esta importante responsabilidade de representar as XSG.

Pero teño que recoñecer que para min este foi un momento de sentimentos enfrontados, porque por un lado alégrome moito pola nosa nova Secretaria Xeral e polos demais compañeiros e compañeiras, pero por outro estou triste porque marcha Loli, a compañeira que durante estes últimos anos dedicou todo o seu traballo e todos os seus esforzos nas XSG. Grazas a ela e ao seu equipo as XSG avanzaron e conseguiron que hoxe teñamos a gran organización que temos. Especialmente a Loli dende aquí quero agradecerlle o seu gran traballo durante estes anos nas XSG, porque lle estou moi agradecido polo seu apoio e por estar sempre cando a necesitamos.

Tamén quero agradecerlles a moitas máis persoas das XSG que están ao meu lado e me apoian, como Loli, Tamara, María García, Pablo, María Torres, Azu, Antonio, Rocío, Alberto, ... Demostráronme que non estou só e danme forzas para seguir adiante día a día. O que fai que me sinta aínda máis orgulloso de estar e de participar nas XSG.

XIII Congreso das XSG

Xuventudes Socialistas de Galicia celebra o seu XIII Congreso Nacional os días 9 e 10 de maio no concello de Fene.

Un congreso non é só unha actividade orgánica, é o momento de tomar partido, de dicirlle á sociedade e ós mozos e mozas galegos quen somos, que queremos, cara onde imos.

Cando dicimos que DECIDIMOS queremos dicir que contamos, que opinamos, que escoitamos.

DECIDIMOS movernos.

DECIDIMOS opinar, contar.

DECIDIMOS decidir.

DECIDIMOS participar.

DECIDIMOS loitar por unha Galicia de todos/as e para todos/as.

E tí, que decides?

Intervención das XSG no Congreso

Este vídeo recolle a intervención de Loli Rodríguez, Secretaría Xeral das XSG, durante o 11 Congreso Nacional do PSdeG-PSOE. Unha intervención que afonda nos principios e valores socialistas. E teño que dicir que para min foi emocionante escoitar a nosa compañeira pronunciando estas verbas, que seguro que tamén emocionaron a tódolos compañeiros e compañeiras do noso partido.

Foi un discurso que destacou neste Congreso, que nos fai reflexionar e nos recorda que debemos seguir loitando polos valores socialistas e comprometernos cos mesmos. Uns valores como o republicanismo, o laicismo, o federalismo, o galeguismo ou a solidariedade. E recórdanos que debemos sentirnos orgullos por militar e compartir estes valores socialistas. E como dixo Loli, eu tamén quero rematar este comentario dicindo que, se cadra, a utopía non é un sono, é unha verdade prematura.

Finalizou o Congreso

Esta tarde rematou o 11 Congreso Nacional do Partido Socialista de Galicia. Nesta segunda xornada do Congreso a lista da Comisión Executiva do PSdeG recibiu o respaldo do 93,43% dos votos dos delegados e delegadas. Algunhas das novidades desta lista foron a creación do cargo de Vicesecretario Xeral, que será para Ricardo Varela, e o nomeamento dunha muller como Secretaria de Organización, a deputada autonómica e Concelleira de Urbanismo na Coruña, Mar Barcón.

Un Congreso no que se puxo de manifesto que o PSdeG-PSOE é o partido que está a cambiar Galicia, para que se converta nun país politicamente moderno, economicamente próspero e socialmente avanzado. E neste sentido Touriño dixo que o PSdeG é a forza capaz de transformar Galicia e de facelo a partir de ideas propias e dun proxecto propio, elaborado e desenvolvido en Galicia, nacido do diálogo coa sociedade galega e do compromiso cun ideario que se nutre continuamente dese diálogo.

Na foto podedes verme co meu compañeiro Suso e Adriana Viz, unha compañeira de Lalín que coñecín no Congreso e que tamén é unha blogguer. Nese momento estabamos na zona destinada aos bloggers. Na que vos podo dicir que houbo moita participación de compañeiros e compañeiras, que tamén quixeron comentar nos seus blogs o que acontecía neste Congreso.

1ª xornada do Congreso

Esta maña o meu compañeiro Suso e eu chagamos a Santiago de Compostela, onde deu comezo o 11 Congreso Nacional do PSdeG, que se celebra hoxe e maña no Pazo de Congresos e de Exposicións. O primeiro que tiven que facer foi recoller a miña credencial de blogger, que me permite acceder a calquera espazo do Congreso. E deste xeito podo contarvos o que acontece neste importante evento para o noso partido.

Un Congreso no que Emilio Pérez Touriño foi reelixido como Secretario Xeral do Partido Socialista de Galicia, co apoio do 97,37% dos delegados e delegadas presentes no Congreso. Nas urnas entraron 444 papeletas a favor e 12 abstencións, sen ningunha candidatura que se opuxese á oficial. Polo que Touriño acadou o apoio e a confianza para seguir catro anos máis á fronte dos socialistas galegos.

Este é o Congreso da revitalización e fortalecemento do noso partido para conseguir impulsar o proxecto do cambio político en Galicia. E está a ser un Congreso vivo, con debate e participación, onde a solución que se está a propoñer é máis e mellor Partido. Téntase avanzar nas seguintes liñas de acción política: fortalecemento do partido; potenciación do papel da militancia; revitalización do debate de ideas, do pluralismo e da democracia interna e participativa; apoio ás agrupacións das vilas e dos pequenos concellos; avanzar e dinamizar o cambio político en Galicia; e con vocación de acadar a maioría social en Galicia.

11 Congreso Nacional do PSdeG-PSOE

O 11 Congreso Nacional do PSdeG-PSOE terá lugar os días 26 e 27 de xullo no Pazo de Congresos e de Exposicións de Santiago de Compostela. Baixo o lema "A Forza de Galicia" celebrarase este Congreso, co desexo de ser cada día un partido máis útil para a sociedade galega, como dixo o Secretario de Organización dos socialistas galegos, Ricardo Varela.

Como novidade nesta edición os bloggers imos ter unha presenza importante e fundamental, xa que imos a ser os encargados de trasladar o desenvolvemento e as nosas opinións sobre o que acontece en cada momento no Congreso. Para o que a Organización habilitará unha zona WI-FI para arredor de 50 bloggers que faremos comentarios, propostas, e transmitiremos mensaxes on-line para os internautas.

O PSdeG é tamén pioneiro na creación dun blog, no que se amosa unha nova visión do Congreso e no que poderán participar os internautas enviando comentarios. E tamén hai unha web específica do 11 Congreso con información diversa e de interese, especialmente para os participantes no mesmo.

37 Congreso do PSOE

Este vídeo recolle as principais pasaxes do primeiro discurso de Zapatero ante o plenario, durante o 37 Congreso do PSOE, antes de ser reelixido Secretario Xeral. O 98,5% dos delegados e delegadas do Congreso apoiaron ao presidente.