Debate sobre o estado do Concello

Onte tivo lugar no Salón de Plenos do Concello de Lugo o Debate sobre o estado do Concello. Na súa intervención o Alcalde destacou que hai un proxecto de cidade iniciado hai once anos que continúa, porque así o quixemos os lucenses, e que levou á modernización, mellora e cambio deste Concello como nunca se deu no seno do mesmo. E isto é algo evidente, aínda que por moito que o intente a oposición, a realidade de Lugo non se pode negar, porque a vemos tódolos días os cidadáns e ben sabemos que as verbas do Alcalde de Lugo son certas.

Estamos case ao final do actual mandato e este proxecto non se para e continua o progreso de Lugo. Porque esa é a finalidade e o norte das políticas desenvolvidas: un cambio profundo no eido social sen esquecer nunca aos que más o necesitan; un cambio da vida cultural porque Lugo está á altura das cidades das súas características; un cambio no eido deportivo no que as instalacións deportivas nada teñen que ver coas que había antes de 1999; un cambio no coñecemento e promoción da cidade e por iso no aumento paulatino de turistas que estamos a vivir; un cambio no desenvolvemento urbanístico que levou a que barrios enteiros ofrezan un aspecto totalmente distinto o que tiñan.

Un cambio nas dotacións e nos equipamentos, tanto na zona urbana como na zona rural; un cambio nas infraestructuras viarias e medioambientais que fan da nosa cidade e da zona rural un modelo a seguir; un cambio na preocupación e deseño na colaboración na educación por parte do Concello de Lugo; un cambio na atención as persoas en paro cos continuos programas de reinserción laboral e promocións de políticas emprendedoras do Concello; un cambio constante na apertura da administración municipal aos veciños, tanto da zona urbana como rural, facendo que cheguen as novas tecnoloxías; un cambio que fixo da cidade de Lugo unha das cidades máis seguras de España...

Uns cambios que transformaron ao Concello e que a preparou para afrontar os riscos do futuro, con prudencia pero sen temor. E temos un Goberno Municipal socialista que está á altura das circunstancias polo ben de Lugo. Hai outras obras que están comezadas tanto na zona rural como na zona urbana que responden a ese espírito de modernización e de igualación dos veciños vivan onde vivan. Aínda quedan moitas cousas por facer, como recoñeceu o Alcalde, así que podemos e debemos seguir nesta dirección que nos fai avanzar cara diante.

Os de Lugo somos así

Lugo 10 poñerá en marcha unha campaña co lema “Os de Lugo somos así”. O Concello de Lugo presentou esta campaña que difundirá mensaxes sobre os atractivos de Lugo e o carácter dos lucenses tamén en Santiago de Compostela. A campaña comezará este mes de setembro e rematará o 30 de novembro, co peche do programa conmemorativo do décimo aniversario da declaración da Muralla como Patrimonio Mundial.

Mensaxes que describen aspectos da cidade e do xeito de ser dos lucenses: somos hospitalarios, amigos dos nosos amigos, encántanos as tapas, desfrutar das festas, temos un patrimonio marabilloso e unha historia cun valor incalculable, góstanos a natureza, o deporte… todas esas ideas conclúen no slogan: Os de Lugo somos así.

Tamén quero aproveitar para recomendarvos que participedes no concurso organizado por Lugo10 para todos os amigos en Facebook, Twitter e redes sociais, no que hai en xogo estupendos regalos e sobre todo, o prestixio de ser o creador dun slogan que levaremos por bandeira. O único que tes que facer é ler as bases con atención e deixar un comentario coa túa proposta de slogan para Lugo 10.

Porque nos gusta Lugo, porque hai que celebrar estes dez anos do nomeamento da Muralla como Patrimonio Mundial. Porque estamos orgullosos da nosa terra, da nosa cultura, do noso patrimonio, da nosa gastronomía e a nosa forma de ser. Porque somos unha cidade 10. Queremos encontrar entre todos o mellor slogan para Lugo 10. Un slogan que se difundirá rapidamente entre todas e todos e que representará todo un emblema para Lugo.

Máis información sobre este concurso no Facebook de Lugo10.

Pacto Provincial polo Emprego

Hoxe o Presidente da Deputación de Lugo, José Ramón Gómez Besteiro, propuxo aos alcaldes e técnicos municipais un pacto para crear 540 empregos nas profesións con máis futuro da provincia para o periodo 2010-2011. Unha importante iniciativa para os Concellos; que permite afrontar un ano difícil, no que hai menos recursos. Este programa busca formar aos desempregados e traballar en común.

Na xuntanza que tivo lugar na Deputación e na que participaron Alcaldes de técnicos de 58 Concellos, José Ramón Gómez Besteiro explicou o papel clave que terán os Concellos e fíxoos co-partícipes no Pacto Provincial polo Emprego, porque o obxectivo é conseguir que os máis de cincocentos desempregados de toda a provincia reciban formación especializada e que sirva para crear traballo en áreas que nada teñen nada que ver coa demanda de hai tres anos.

A Deputación e a Unión Europea farase cargo de tódolos custes económicos do programa, así como da organización e execución de cada paso, ademais da formación dos técnicos de emprego. O Pacto Provincial polo Emprego dispón de preto de 4 millóns de euros financiados pola Deputación nun 20% e o Fondo Social Europeo no 80% restante.

A formación comprenderá 45 cursos dirixidos a desempregados de todos os Concellos, excepto o de Lugo que, ó ter máis de 50.000 habitantes, conta co seu propio programa. En total suma máis de 15.000 horas de formación e 60.000 de prácticas en empresas. Ademais, os beneficiarios recibirán unha axuda económica tanto na formación como nas prácticas equivalente ó 75% do IPREM, é dicir, uns 400 euros mensuais.

Para máis información, pódese consultar a páxina do Pacto Provincial polo Emprego.

O rural achégase ás Novas Tecnoloxías

A rede de Telecentros Rurais do Concello de Lugo consta na actualidade con oito sedes, situadas nas antigas escolas rurais de: Coeses, Calde, Castelo, O Veral, San Xoán do Campo, Santa María de Bóveda, Santa Comba e San Pedro de Mera. Estes telecentros están dotados coa última tecnoloxía, unha rede de banda ancha WiMAX/Wifi.

Ante a boa acollida dos veciños das zonas rurais lucenses, o Concello de Lugo está a ampliar esta rede de Telecentros con doce sedes máis; así os futuros telecentros estarían situados nas parroquias de: Adai, Barbaín, Bocamaos, O Burgo, Camoira, Pedreda, Poutomillos, Rubiás, Saá, San Xoán do Alto, Vilachá de Mera e Meilán.

Con esta iniciativa o Concello de Lugo pretende achegar aos veciños da zona rural de Lugo, o uso das Novas Tecnoloxías. Para lograr este labor configurouse o proxecto PARNET-TIC, un proxecto transfronteirizo para fomentar a sociedade de información, que contribuirá con interesantes actividades de diverso índole (informativas, formativas, lúdicas...) a mostrarlles aos cidadáns da zona rural lucense as vantaxes da utilización da tecnoloxía TIC nas súas prácticas diarias, así como achegar a administración electrónica (e-administración) aos máis de 3.685 veciños que se beneficiarán da devandita iniciativa.

Dentro do proxecto PARNET-TIC, dous titores TIC, seremos os encargados de fomentar a Sociedade da Información nos territorios rurais, fomentando o uso da e-administración e a e-participación. E podedes atopar máis información no cuarto número do boletín electrónico mensual de PARNET-TIC, que acabamos de publicar, onde dun xeito próximo, recollemos as actividades levadas a cabo polo Proxecto así como un breve adianto de eventos futuros e outro tipo de actos que poidan resultar de interese e que teñan que ver coa temática TIC e a Administración Pública.

Os cambios na Deputación

Sen lugar a dúbidas, os cambios que se levan producido na Deputación de Lugo co actual equipo de goberno provincial, están transformando e mellorando a nosa provincia. Agora contamos cun Presidente da Deputación, José Ramón Gómez Besteiro, que traballa contando cos alcaldes e cos veciños de tódolos concellos da provincia, para resolver os problemas que lles afectan.

En tan só tres anos, a Deputación cumpriu o 98% do programa de goberno. Dos 11 puntos que se marcaron en xullo de 2007, dez deles están feitos. Eran os seguintes: impulsar a reformulación da Sociedade Urbanística Provincial, de xeito que hoxe SUPLUSA traballa non só en clave de polígonos senón tamén en dotacións sociais con retorno económico; promover a comparecencia regrada dos Presidentes das Deputacións no Parlamento Galego, algo tan normal pero que era extraordinario hai tres anos.

Tamén se está a coordinar políticas coa Xunta de Galicia nos ámbitos nos que a Comunidade Autónoma é titular de competencias, de tal xeito que se pasou de ser a única Deputación española que aínda mantiña hospitais a iniciar o proceso histórico de traspaso ó SERGAS e de ser a única provincia galega sen bombeiros a poñer en marcha o consorcio provincial de extinción de incendios.

Outros puntos cumpridos do acordo son: iniciar o proceso de compensación aos Concellos afectados polo canon enerxético, asunto no que a Deputación xa investiu 11 millóns de euros de acordo cos municipios afectados; cumprir coa Lei de Normalización Lingüística; impulsar unha nova política de selección de persoal; establecer como prioridade da Deputación a cooperación e asistencia aos Concellos con baremos obxectivos e impulsando as accións mancomunadas. Na actualidade, os programas de cooperación aforran aos Concellos preto de 78 millóns de euros.

Ademais, a Deputación foi a primeira Administración galega cun plan económico-financeiro, que lle permite manter a estabilidade económica e acadar a estabilidade financeira un ano antes da vixencia do plan. Agora os novos retos do organismo provincial, seguindo o primeiro Plan Estratéxico da provincia, están a ser as accións mancomunadas cos Concellos, a consolidación da administración electrónica, acadar o pacto polo campo e captar novos fondos europeos.

Unha estación intermodal para Lugo

Esta mañá o Alcalde de Lugo, José López Orozco; o Ministro de Fomento, José Blanco; e o Conselleiro de Medio Ambiente, Agustín Hernández, asinaron o protocolo para a implantación dunha estación intermodal na cidade de Lugo. Na nova estación intermodal, que se situará na ubicación da actual estación de RENFE, integrarase a estación ferroviaria de alta velocidade cos demáis sistemas de transporte urbán e interurbán para facilitarlles aos usuarios o intercambio entre o ferrocarril e outros medios de transporte.

Na negociación para conseguir este importante acordo o Alcalde, defendendo os intereses de Lugo, conseguiu que se incorpore claramente que o pobo de Lugo non vai a ter que poñer nin un só euro, nin ceder e recalificar ningunha das parcelas do patrimonio municipal de solo que nada teñen que ver con estas actuacións. Polo que non lle custara nada ao Concello á reurbanización da zona na que se situará a nova estación intermodal, xa que o Ministerio de Fomento aportará o 50% e o outro 50% vaino aportar a Xunta. O Concello de Lugo só se terá que encargar da reurbanización dos actuais terreos da estación de autobuses, que son propiedade municipal.

Ademáis, o protocolo asinado hoxe, que respecta a ubicación estratéxica da actual estación ferroviaria de Lugo, establece a necesidade de optimizar recursos, integrando os servizos de hostalería, aparcamento, equipamentos de oficinas e comercias nas instalacións actuais cos previstos na remodelación futura. Para elo, aportaranse os recursos económicos necesarios.

Máis concretamente, o protocolo establece a remodelación do feixe de vías existente para a súa adaptación á chegada da alta velocidade e a construcción dun novo edificio de viaxeiros, que se integre no actual, así como a remodelación do conxunto de instalacións ferroviarias para favorecer a intermodalidade cos demáis sistemas de transporte. Deste xeito, como dixo o Alcalde, poderase facer realidade esta infraestrutura, que é moi importante para a modernización de Lugo.