Isto é austeridade?

Xa levo varias ocasións nas que me fago a seguinte pregunta: isto é austeridade? Onte volvín a facerme esa pregunta ao ler nun xornal que a Xunta de Galicia pagou máis de 4 millóns de euros a microsoft e que renunciou ao 'software' libre. Esta licitación contradí a promesa electoral de Feijóo de que o seu goberno apostaría polo software libre, que sería gratuíto, sen caducidade e con versión en galego, uns elementos dos que carece microsoft. Outros momentos nos que me fixen esa pregunta foron ao saber que dende a Xunta se van a gastar 500 millóns na Cidade da Cultura, ou que a visita do Papa nos vai a custar a tódolos galegos máis de 3 millóns de euros.

O que chama máis a atención é que se gaste esa cantidade de diñeiro na visita do Papa a Santiago por parte do Xacobeo e, en cambio, para un evento cultural tan importante, como son as Festas do San Froilán de Lugo, case non contaron co apoio económico do Xacobeo. O que demostra que para o goberno do Sr. Feijóo é máis prioritario a visita do Papa ou a Cidade da Cultura, que colaborar nas Festas do San Froilán, declaradas como Festa de Interese Turístico Galego e Fiesta de Interés Turistico Nacional.

Pero aínda é peor que para a Xunta de Galicia non sexan unha prioridade as políticas sociais, por exemplo, é especialmente destacable que o goberno do PP decidira suprimir o servizo de transporte nocturno para a mocidade, coñecido como "NoiteBús". Aínda que as cifras de utilización de NoiteBús consolidárono progresivamente como alternativa segura e real ao emprego do vehículo privado nos desprazamentos nocturnos a zonas de ocio e, sobre todo, como unha medida de mellora a seguridade viaria. Deste xeito, parece que á Xunta non lle importa a seguridade da xuventude nos desprazamentos nocturnos.

A miña pregunta é como se lle pode chamar austeridade a gastar grandes cantidades de diñeiro público na Cidade da Cultura, ou na visita do Papa a Santiago e a suprimir servizos que contribúen ao benestar social en xeral.

Unha boa nova para AGRUPALUGO

Dende a “Agrupación de Asociacións de Veciños de Lugo AGRUPALUGO” queremos amosar a nosa satisfacción porque esta tarde a Cooperativa Moega fora premiada polo Ministerio de Medio Ambiente e Medio Rural e Mariño co Premio de Excelencia á Innovación para Mulleres Rurais. Trátase dunha Cooperativa de Traballo Asociado, para fomentar o emprego e achegar servizos sociais ao medio rural. Esta cooperativa foi posible porque traballadoras e traballadores de Centros de Dinamización Social do rural do concello de Lugo uníronse para crear “Moega Sociedade Cooperativa Galega”, a iniciativa da Asociación Cultural, Xuvenil e Veciñal “O Castro” de Coeses.

Como Presidente de AGRUPALUGO, podo indicar que para a entidade que represento trátase dunha moi boa nova, posto que AGRUPALUGO apoiou esta candidatura, que foi froito dun proxecto dunha asociación que forma parte da Agrupación. Dende AGRUPALUGO queremos felicitar ás compañeiras e compañeiros que traballaron para que este proxecto se puidera levar a cabo. Para esta Agrupación iniciativas como esta son unha boa mostra do traballo que estamos a realizar polo desenvolvemento da zona rural.

A Ministra de Medio Ambiente e Medio Rural e Mariño, Elena Espinosa, entregou este mércores, 13 de outubro, os 20 galardóns da I edición dos Premios de Excelencia á Innovación para Mulleres Rurais, no marco da celebración do Día Internacional da Muller Rural, que se celebra o 15 de outubro. O Ministerio publicou no Boletín Oficial do Estado do 6 de outubro a relación de galardoados. Por parte da Cooperativa Moega o premio recolleuno a compañeira Mary Paz de la Fuente, Presidenta da Asociación Cultural, Xuvenil e Veciñal “O Castro” de Coeses.

O obxecto destes premios é distinguir iniciativas orixinais e innovadoras, que apliquen modelos de negocio baseados na xestión sostible dos recursos rurais. Nos proxectos que foron distinguidos nesta primeira edición, un total de vinte, ponse de manifesto a potencialidade da muller como axente desenvolvedor do medio rural a través da súa participación no mercado laboral. Esta situación implica unha maior independencia económica, ademais da visibilización e o recoñecemento das achegas das mulleres á sociedade en todos os ámbitos, avanzando así na igualdade efectiva entre homes e mulleres.

Estes proxectos deben servir para explorar novos depósitos de emprego ou para responder ás necesidades das mulleres no medio rural. Todo iso, co fin de contribuír ao desenvolvemento sostible do medio rural. A cantidade asignada nos Premios de Excelencia para mulleres rurais en 2010 ascende a 500.000,00 euros, repartidos en 20 premios de 25.000,00 euros cada un, para proxectos relacionados coas axudas para a dependencia e a educación infantil ata a agroalimentación, os cosméticos e a consultoría ambiental.

Comeza o San Froilán 2010

Dende hoxe día 4 e ata o 12 de outubro Lugo está de festa, porque celebramos as festas do San Froilán. Durante estes nove días os lucenses e os que nos visiten poderemos participar nun amplo programa festivo, con actividades para tódolos gustos. Trátase dunhas festas que conxugan a tradición coa modernidade, declaradas como Festa de Interese Turístico Galego e Fiesta de Interés Turistico Nacional.

Estas festas están organizadas polo Concello de Lugo e permítennos disfrutar de moitas actividades, como asistir a concertos, dar unha volta polo recinto feiral, ver competicións deportivas, comer o polbo á feira nas casetas, todos eles uns elementos que non poden faltar no San Froilán. E os máis pequenos teñen o San Froilanciño cunha morea de actividades para eles. Así que como lucense invítovos a todos e a todas a que veñades a Lugo a gozar destas festas.

As festas do San Froilán 2010 teñen de especial que neste ano celebramos o décimo aniversario da proclamación da Muralla de Lugo como Patrimonio Mundial, polo que se está a levar a cabo o programa Lugo10. Os lucenses estamos orgullosos da nosa cidade, e este ano máis ca nunca abriremos con ledicia as dez portas da Muralla aos milleiros de persoas que nos visiten durante as festas.

Que o pasemos moi ben e que todos e todas teñamos unhas felices festas!

Formación nos Telecentros

A Concelleira de Servizos Xerais do Concello de Lugo, Luisa Zarzuela, presentou unha iniciativa para achegar as novas tecnoloxías ás zonas rurais de Lugo. As actividades terán lugar nas parroquias da zona rural do municipio, e están incluídas no Proxecto europeo PARNET-tic.

PARNET-tic é un proxecto destinado ao fomento da sociedade da información nos territorios rurais, fomentando o acceso ás infraestruturas da comunicación e a sociedade da información. Este proxecto intégrase no programa de cooperación territorial “Espacio Sudoeste 2007-2013” da Unión Europea.

Son actividades dirixidas a toda a poboación, pero sobre todo á xente máis maior que quere pedir cita no médico, solicitar un certificado no Padrón ou visitar un museo. O programa formativo ten como obxectivo iniciar aos usuarios tanto no manexo dos sistemas operativos e de certas aplicacións convencionais, como o uso de Internet e das novas tecnoloxías aplicadas ao uso cotián. Está dividido en dúas partes, unha sobre a iniciación ao mundo da informática e outra sobre a navegación por Internet.

Á xente maior interésalles as novas tecnoloxías. Por exemplo na cidade as actividades no Telecentro do Castiñeiro teñen moitísimo éxito, xa que os 15 ordenadores sempre están ocupados. Os obxectivos deste telecentro son formar os usuarios de coñecementos básicos para utilizar un ordenador, así como crear habilidades na navegación por Internet e a comunicación mediante o correo electrónico.

As actividades formativas no rural terán lugar na Rede de Telecentros Rurais: Calde, Coeses, Castelo, San Pedro de Mera, Santa Comba, San Xoán do Campo, Santa María de Bóveda e O Veral. A programación levarase a cabo dende o 28 de setembro ata o 27 de xaneiro, tódolos martes e xoves dende as 18.00 horas ata as 19.30 horas.

Hoxe comezamos coa programación formativa nos Telecentros Rurais de Calde e Coeses e estou moi contento pola boa acollida que tivemos entre os veciños. E dende o meu blog animo a tódolos lucenses a participar nas distintas actividades que organizamos dende o Concello de Lugo nos distintos telecentros municipais da zona rural e da cidade.

Para máis información no teléfono 010 do Concello ou na web www.lugo.es.

Debate sobre o estado do Concello

Onte tivo lugar no Salón de Plenos do Concello de Lugo o Debate sobre o estado do Concello. Na súa intervención o Alcalde destacou que hai un proxecto de cidade iniciado hai once anos que continúa, porque así o quixemos os lucenses, e que levou á modernización, mellora e cambio deste Concello como nunca se deu no seno do mesmo. E isto é algo evidente, aínda que por moito que o intente a oposición, a realidade de Lugo non se pode negar, porque a vemos tódolos días os cidadáns e ben sabemos que as verbas do Alcalde de Lugo son certas.

Estamos case ao final do actual mandato e este proxecto non se para e continua o progreso de Lugo. Porque esa é a finalidade e o norte das políticas desenvolvidas: un cambio profundo no eido social sen esquecer nunca aos que más o necesitan; un cambio da vida cultural porque Lugo está á altura das cidades das súas características; un cambio no eido deportivo no que as instalacións deportivas nada teñen que ver coas que había antes de 1999; un cambio no coñecemento e promoción da cidade e por iso no aumento paulatino de turistas que estamos a vivir; un cambio no desenvolvemento urbanístico que levou a que barrios enteiros ofrezan un aspecto totalmente distinto o que tiñan.

Un cambio nas dotacións e nos equipamentos, tanto na zona urbana como na zona rural; un cambio nas infraestructuras viarias e medioambientais que fan da nosa cidade e da zona rural un modelo a seguir; un cambio na preocupación e deseño na colaboración na educación por parte do Concello de Lugo; un cambio na atención as persoas en paro cos continuos programas de reinserción laboral e promocións de políticas emprendedoras do Concello; un cambio constante na apertura da administración municipal aos veciños, tanto da zona urbana como rural, facendo que cheguen as novas tecnoloxías; un cambio que fixo da cidade de Lugo unha das cidades máis seguras de España...

Uns cambios que transformaron ao Concello e que a preparou para afrontar os riscos do futuro, con prudencia pero sen temor. E temos un Goberno Municipal socialista que está á altura das circunstancias polo ben de Lugo. Hai outras obras que están comezadas tanto na zona rural como na zona urbana que responden a ese espírito de modernización e de igualación dos veciños vivan onde vivan. Aínda quedan moitas cousas por facer, como recoñeceu o Alcalde, así que podemos e debemos seguir nesta dirección que nos fai avanzar cara diante.

Os de Lugo somos así

Lugo 10 poñerá en marcha unha campaña co lema “Os de Lugo somos así”. O Concello de Lugo presentou esta campaña que difundirá mensaxes sobre os atractivos de Lugo e o carácter dos lucenses tamén en Santiago de Compostela. A campaña comezará este mes de setembro e rematará o 30 de novembro, co peche do programa conmemorativo do décimo aniversario da declaración da Muralla como Patrimonio Mundial.

Mensaxes que describen aspectos da cidade e do xeito de ser dos lucenses: somos hospitalarios, amigos dos nosos amigos, encántanos as tapas, desfrutar das festas, temos un patrimonio marabilloso e unha historia cun valor incalculable, góstanos a natureza, o deporte… todas esas ideas conclúen no slogan: Os de Lugo somos así.

Tamén quero aproveitar para recomendarvos que participedes no concurso organizado por Lugo10 para todos os amigos en Facebook, Twitter e redes sociais, no que hai en xogo estupendos regalos e sobre todo, o prestixio de ser o creador dun slogan que levaremos por bandeira. O único que tes que facer é ler as bases con atención e deixar un comentario coa túa proposta de slogan para Lugo 10.

Porque nos gusta Lugo, porque hai que celebrar estes dez anos do nomeamento da Muralla como Patrimonio Mundial. Porque estamos orgullosos da nosa terra, da nosa cultura, do noso patrimonio, da nosa gastronomía e a nosa forma de ser. Porque somos unha cidade 10. Queremos encontrar entre todos o mellor slogan para Lugo 10. Un slogan que se difundirá rapidamente entre todas e todos e que representará todo un emblema para Lugo.

Máis información sobre este concurso no Facebook de Lugo10.