Compromisos cumpridos

Importantes infraestruturas para Lugo, como a Nova Ponte sobre o Río Miño, están sendo unha realidade froito do compromiso do Ministro de Fomento, José Blanco. Un home que fixo posible que Lugo conte no mapa das infraestruturas. Mentres que o Goberno do PP non atendeu as necesidades das infraestruturas que precisamos, o Goberno socialista presidido por Zapatero en outubro de 2004 tivo unha sensibilidade e adquiriu uns compromisos con Lugo, que se están a materializar coa realización de proxectos necesarios para o avance de Lugo.

Deste xeito o ano pasado o Ministro puxo en servizo o desdobramento da N-VI no tramo Nadela-Tolda de Castela, na circunvalación de Lugo. O investimento alcanzou os 28,8 millóns de euros e conseguiu mellorar os accesos e as comunicacións da cidade de Lugo. O trazado de 4,5 km. contemplou a construción de varias rotondas e na súa construción observáronse unha serie de medidas correctoras ambientais e arqueolóxicas, recollidas na Declaración de Impacto Ambiental.

Tamén no pasado ano o Ministerio de Fomento licitou e adxudicou as obras da nova ponte sobre o río Miño cun orzamento de 21,5 millóns de euros. Ademais da ponte, construiranse os viarios necesarios para conectar a circunvalación da N-VI coas estradas do sur de Lugo, coa estrada de Portomarín e coa antiga estrada de Santiago. Co acordo co Concello lucense sobre o acceso á ponte desde a glorieta que conecta coa N-VI, facilitaranse os accesos da capital á futura autovía de Lugo a Santiago.

Ademais están en construción outras infraestruturas que beneficiarán moito a Lugo, como as autovías Lugo-Santiago e Lugo-Ourense. E nos próximos meses levarase a cabo o convenio para o arranxo de todos os espazos verdes das estradas do Ministerio de Fomento nas entradas da cidade.

Este avance de Lugo no sería posible sen o traballo do Ministro de Fomento e do Alcalde de Lugo. Deste xeito a nova Ponte e máis infraestruturas importantes para Lugo serán unha realidade grazas a José Blanco e a José L. Orozco. Eu estaba seguro de non nos fallarían aos lucenses e os acontecementos están a demostrar que non me equivocaba.