Felices festas!

A compañeira Loli Rodríguez, Secretaria Xeral de Xuventudes Socialistas de Galicia e Presidenta do Consello da Xuventude de Galicia, mandoume esta postal de felicitación do 2009 con estas verbas e con esta mensaxe, que co seu permiso, eu tamén quero compartir con todos e todas vos.

Quero desexarvos a todos e todas unhas felices festas e un próspero ano 2009. Un ano no que agardo que se fagan realidade tódolos nosos soños para mellorar as nosas vidas. Así que recibide os meus mellores desexos para o novo ano.

Volverei a estar con vos no meu blog despois destas festas, concretamente o día que este espazo virtual cumplirá un ano. Ata entón pasádeo moi ben e que sexades moi felices!

Grazas polo voso apoio

Hoxe celebráronse eleccións a representantes nas xuntas de centro da Universidade de Santiago de Compostela. Despois de seguir esta xornada electoral na miña facultade como candidato a representante de estudantes de 1º e 2º ciclo por IESGA e de estar no reconto dos votos, podo informarvos do resultado destas eleccións na Facultade de Ciencias Políticas e Sociais, que foi o seguinte: a Asemblea de Estudantes de CC.PP. terá 9 representantes e IESGA teremos 2 representantes na Xunta de Facultade.

Por parte de IESGA saímos elixidos o meu compañeiro Alejandro Peso e eu. Así que quero agradecervos a tódolos compañeiros e compañeiras da Facultade de Ciencias Políticas e Sociais que nos destes a vosa confianza para que fosemos os vosos representantes na Xunta de Facultade. Un agradecemento que tamén vos dou en nome de IESGA a tódalas persoas que nos apoiastes nestas eleccións. Especialmente quero agraceder o traballo que realizaron os meus compañeiros e compañeiras de IESGA, xa que sen o seu esforzo este resultado non sería posible. E tamén quero felicitar aos compañeiros e compañeiras da Asemblea de Estudantes de CC.PP. que saíron elixidos para ser as representantes do alumnado, aos que lles desexo moita sorte no seu traballo.

A miña valoración destes resultados acadados por IESGA é moi positiva, porque pasamos de non ter representación na Xunta de Facultade a ter 2 representantes. E aos meus compañeiros de IESGA, Mario, Álvaro, María, Abel e Bernabé, que non saíron elixidos, que tamén traballaron intensamente para conseguir esta representación, doulles as grazas e ánimos para seguir traballando, porque estou seguro que se seguimos traballando como o estamos facendo o resultado de IESGA mellorará. Como representante electo e como Coordinador de IESGA na facultade tédesme a vosa disposición para o que poida axudarvos. Agora traballaremos na Xunta de Facultade pola defensa dos intereses do estudantado e para que as nosas propostas electorais sexan unha realidade.

Se queredes máis información sobre este proceso electoral ou saber quen vos vamos a representar podedes velo no apartado dedicado a estas eleccións na web da USC.

O 17 de decembro participa

O 17 de decembro celebraranse eleccións a representantes nas xuntas de centro (facultades e escolas) na Universidade de Santiago. Unhas eleccións ás que nos presentamos como candidatos por IESGA a representantes de estudantes de 1º e 2º ciclo na Xunta da Facultade de Ciencias Políticas e Sociais os compañeiros: Mario Pais Beiro (1º), Alejandro Peso Lago (1º), Álvaro Sande Rabuñal (1º), María García Jartín (4º), Abel Fernández Vidal (1º), Bernabé González Fernández (1º) e eu, Diego Pena Luaces (5º).

E aos compañeiros e compañeiras que estudades con nós na facultade pedímosvos a vosa confianza nas eleccións do próximo mércores 17 de decembro, para conseguir levar a cabo as nosas propostas para a nosa facultade, que son tamén as vosas propostas, e polos seguintes motivos:

Porque defendemos o dereito á folga sen entrar
alborotando nas aulas nin ameazando a ninguén.
Porque defendemos a conxelación das taxas sen ter que
falar portugués nin inventar palabras.
Porque non pensamos que haxa que facer folgas cada dous
por tres para conseguir as cousas (nós acadámolas
negociando e traballando).
Porque non insultamos a aqueles que pensan diferente,
porque todo o mundo ten o dereito a expresarse pense o
que pense.
Porque somos estudantes normais coma ti, e só queremos
que a nosa Universidade sexa un lugar mellor.
Se eres coma nós non o dubides… IESGA

IESGA condena o boicot a Feijóo

Como Coordinador de IESGA (Iniciativa Estudantil Galega) na Facultade de Ciencias Políticas e Sociais da Universidade de Santiago de Compostela quero manifestar en nome de IESGA a nosa rotunda condena ao boicot e aos ataques contra o presidente do PP de Galicia, Alberto Núñez Feijóo, no transcurso da conferencia que o pasado mércores impartiu na nosa facultade (como se pode ver neste vídeo).

Como se pode ver nas imaxes, uns candidatos que se presentan por unha asociación de estudantes nas próximas eleccións na USC participaron neste boicot apoiando aos que realizaron os ataques. Polo que queremos aclarar que neste contexto IESGA non vai a participar no debate electoral, que estaba previsto realizar o vindeiro luns na nosa facultade entre as tres agrupacións electorais que se presentan nestas eleccións (Asemblea, Comités e IESGA). Porque IESGA nunca debatirá con quen non respecta aos demais.

Aínda que en IESGA somos partidarios de debatir e informar, pero ante estes acontecementos decidimos non participar neste debate, porque dende IESGA defendemos a liberdade de expresión de todos e todas. E aínda que non compartamos as opinións de alguén, debemos respectar as súas ideas, porque estamos convencidos de que todos e todas temos dereito a expresarnos en liberdade. Así que queremos deixar claro o noso compromiso de manter informando ao estudantado, así que continuaremos traballando para informar e achegarlles as nosas propostas.

Propostas de IESGA para a nosa facultade

O 17 de decembro celebraranse eleccións a representantes nas xuntas de centro (facultades e escolas) na Universidade de Santiago. Unhas eleccións ás que me presento como candidato por IESGA a representante de estudantes de 1º e 2º ciclo na Xunta da Facultade de Ciencias Políticas e Sociais.

En IESGA (Iniciativa Estudantil Galega) non existen ideas pechadas, defendemos unha universidade pública e de calidade, na que a voz do estudantado sexa escoitada, na que as nosas propostas poidan chegar aos órganos de decisión desta universidade.

As propostas para a nosa facultade son:

• Establecer unha sala de estudo e salas de traballo na facultade.
• Habilitación das aulas baleiras en tempada de exames como salas de estudo.
• Revisión inmediata das distintas instalacións da facultade para mellorar e arranxar as deficiencias que existen na actualidade.
• Adaptación de todas as instalacións da facultade ás necesidades de todos/as os/as estudantes e traballadores/as con discapacidades.
• Creación dunha cafetería na facultade.
• Establecemento dun protocolo para que se informe con tempo cando falte algún profesor/a.
• Servizo de asesoramento ao estudantado de primeiro curso, espazos de información na facultade na primeira semana/primeiro mes de curso.
• Información sobre os asuntos que se tratan nos órganos de goberno e que se lles dea difusión na facultade.
• Maior número de prácticas en empresas e institucións públicas en condicións laborais dignas e cun seguimento efectivo das tarefas realizadas e a súa adecuación á materia.
• Dotar á facultade dun servizo de préstamo e intercambio de apuntamentos entre o estudantado.
• Creación dun mercado de libros usados para os/as alumnos/as xestionado polas asociacións de estudantes.
• Instalar un punto verde con contedores para reciclar os distintos residuos.
• Minimizar o número de residuos que se xeran na facultade, mediante a reutilización, a recuperación e a reciclaxe.
• Fomento dunha maior utilización do papel reciclado na facultade.
• Facilitar o uso das novas tecnoloxías aumentando o horario da aula de informática e dotándoa da infraestrutura suficiente para que proporcione un mellor servizo.
• Fomento do Software libre nos equipos informáticos da facultade.
• Dotación dos medios tecnolóxicos necesarios para que os labores docentes posúan a calidade adecuada, como a adquisición de un ordenador por aula (o que evitaría o retraso provocado ao ter que ir os profesores a buscalo á conserxería).
• Instauración de titorías virtuais na facultade.
• Mellora da web da facultade con máis contidos para os estudantes.
• Publicación das notas provisionais, horario de revisión e notas definitivas en internet e por SMS de modo obrigatorio para todo o profesorado, nos mesmos prazos que nos taboleiros.

Día Mundial da SIDA

Hoxe conmemérase o Día Mundial da Loita contra a SIDA, porque dende fai vinte anos o día 1 de decembro destínase á concienciación pública sobre a infección polo VIH. Este ano o seu tema é o liderazgo. No ano 2001 todos os países do mundo prometeron deter a SIDA para o ano 2015. Ao fin de acadalo, todas as persoas temos que comprometernos tamén. Por iso o lema proposto para este ano é: “Actúa, detén a SIDA. Unidos podemos”.

Por este motivo pola mañá compañeiros e compañeiras de IESGA na Facultade de Ciencias Políticas da USC puxemos unha mesa informativa na nosa facultade, coa finalidade de informar ao estudantado da importancia da prevención da SIDA. Temos que ter en conta que no mundo morre unha persoa de SIDA cada dez segundos. Por iso debemos de actuar todos e todas para deter a SIDA. E porque unidos podemos conseguilo!

O día 25 de novembro

O 25 de novembro é o Día Internacional para a eliminación da violencia de xénero e o Día das persoas "sen teito". Son dúas conmemoracións que nos deberían de invitar a todos e todas á reflexión. Eu penso que ante todo hai que ter en conta de que en ámbolos dous casos, mulleres maltratadas e persoas sen teito, estamos a falar de seres humanos que teñen dereito a unha vida digna, como calquera outra persoa.

No caso das mulleres maltratadas temos que darlles todo o noso apoio e loitar para que estes asasinatos rematen, para que os covardes dos seus maltratadores deixen vivir a estas mulleres. E ademais disto hai que seguir traballando para conseguir a igualdade efectiva entre as mulleres e os homes en tódolos ámbitos.

E en canto as persoas sen teito, tamén teñen o mesmo dereito que calquera outra persoa a ter garantidas as súa necesidades básicas, como son comer, un teito, etc. Pero ademais disto, tamén precisan do noso cariño e afecto, como calquera outro ser humano, xa que é unha necesidade vital máis das persoas.

En definitiva, tódalas persoas teñen dereito a unha vida digna: sen malos tratos, a unha igualdade de oportunidades e cunha atención das súa necesidades vitais.

A pegada ecolóxica

Poño esta viñeta que me pareceu moi interesante e porque trata dun tema que eu estou a ver moi detalladamente, ao ser o Bolseiro de Sostibilidade, Participación e Integración Universitaria na Facultade de Ciencias Políticas e Sociais da Universidade de Santiago de Compostela asistín o mes pasado ao seminario "A pegada ecolóxica" e este xoves temos o seminario "A débeda ecolóxica", organizados polo Plan de Desenvolvemento Sostible da USC. Onde vemos que o concepto de ‘pegada ecolóxica’ representa os custes ecolóxicos dun determinado modelo de vida.

En total, celebraranse un total de catro seminarios en cada campus que, ademais de analizar a pegada ecolóxica, servirán para abordar os hábitos de consumo e alimentación, o transporte e a mobilidade ou a débeda ecolóxica. Ao remate das sesións formativas, os bolseiros organizaremos unha actividade para transmitir dun xeito ameno e práctico algúns dos conceptos teóricos aprendidos ao longo dos seminarios.

Lugo terá orzamentos no 2009

Esta tarde o Pleno do Concello de Lugo outorgou a súa confianza ao equipo de goberno municipal, que dirixe José López Orozco. E deste xeito apróbanse os orzamentos municipais para o ano 2009. Foi posible grazas ao apoio do Grupo Municipal Socialista e a abstención do Grupo Municipal do BNG. E deste xeito os orzamentos entrarán en vigor o 1 de xaneiro do 2009.

Esta foi unha nova positiva para o concello de Lugo. Trátase duns orzamentos que apostan decididamente polo gasto social, o fomento do emprego, a auga de calidade e a continuidade da obra pública, que é tan necesaria neste momento. O Alcalde presentou esta cuestión de confianza para evitar que a cidade de Lugo se quedase sen orzamentos novos nun ano tan difícil economicamente como o que se aproxima debido á crise.

Esta situación puxo de manifesto que mentres o equipo de goberno de Lugo tivo aberto un proceso de diálogo no que se pediu a participación de todos os grupos políticos, o PP non quixo facer ningunha proposta e o BNG decidiu rectificar hoxe e absterse na votación. Así que quedou claro quen traballa por Lugo actuando con responsabilidade e quen non presentou nin unha soa proposta e xustifícano dicindo que en 25 días non foron capaces de facer nada.

Teremos novo regulamento?

Na última reunión da Comisión encargada da elaboración do novo Regulamento de Participación Cidadá do Concello de Lugo chegamos a importantes acordos entre as distintas partes. Deste xeito o texto do novo proxecto de Regulamento xa está listo para aprobar, aínda que non se logrou chegar a acordar un aspecto que tanto PP como BNG tachan de imprescindible para poder aprobalo en pleno, como é a elección democrática dos pedáneos.

Neste sentido a Lei 5/1997, do 22 de xuño, de Administración Local de Galicia (BOE núm. 237, do 3 de outubro de 1997) recolle no seu Artigo 158 o seguinte: “As entidades locais menores contarán cun alcalde pedáneo [...]. O alcalde pedáneo será elixido directamente polos veciños da correspondente entidade local menor, por sistema maioritario, mediante a presentación de candidatos polos distintos partidos, federacións, coalicións ou agrupacións de electores, coincidindo coas eleccións locais".

Tendo en conta que as 54 parroquias da zona rural do concello de Lugo non teñen a consideración de entidades locais menores, non existe a figura xurídica de alcalde pedáneo. E o que realmente existe nas parroquias rurais do concello de Lugo son representantes do alcalde en cada parroquia. E polo tanto correspóndelle ao alcalde de Lugo o seu nomeamento.

Polo tanto non ten ningún sentido que os dous partidos políticos da oposición, tanto o PP como o BNG, pidan a elección democrática dos pedáneos. E como veciño da zona rural cuestiónome por qué o PP, o BNG e a Federación de Asociacións de Veciños piden eleccións democráticas de pedáneos e cando gobernou o PP non facían o mesmo, xa que o PP non convocou eleccións de pedáneos e o BNG e a Federación non o demandaron daquela.

Pero especialmente despois de todo o traballo que levamos feito as distintas partes nesta Comisión, para poder ter un novo regulamento, eu poño en cuestión se todos estamos dispostos a chegar a un consenso polo ben de Lugo, ou se como se está vendo, hai quen non quere ceder e non quere que teñamos un novo regulamento e pon como escusa que os pedáneos sexan elixidos democraticamente.

Xa queda menos!

Xa queda menos para que moitas cousas cambien! E somos moitos os que estamos agardando que chegue este momento, que se producirá con Obama como Presidente dos EEUU... Yes, we can!

ACTUALIZACIÓN: Hoxe, día 5 de novembro, o compañeiro Fran Martínez, publicou no xornal dixital Xornal.com o artigo “A lección americana”. Recoméndovos que vexades este interesante comentario do resultado das eleccións nos Estados Unidos.

Interesante reflexión

Onte o compañeiro José Manuel Lage, deputado socialista no Parlamento de Galicia, recollía no seu blog esta viñeta de Máximo. Pareceume tan interesante a maneira coa que nos fai reflexionar dun tema que está tan presente na nosa sociedade, que quixen tamén poñela no meu blog e invitarvos tamén á reflexión.

Unha fin de semana completa

Esta fin de semana tívena moi completa. O venres pola tarde e o sábado tiven a oportunidade de asistir á IV Escola de Formación 2008 das Xuventudes Socialistas de Galicia, que se celebrou na Casa da Cultura de Sarria. O título da escola foi "A visión estratéxica dunha campaña electoral" e tivo un interesante e completo programa formativo, que me serviu para aprender aspectos relacionados con esta temática. Ademais contou con tres ponentes excelentes, como son a nosa querida compañeira María Torres, Secretaria de Formación das XSG; o actual xefe de prensa da FEGAMP, Javier Carnota; e o noso gran experto en formación Fran Martínez, Ex-Secretario de Formación das XSG.

O domingo organizamos dende a Xunta Directiva da Asociación de Veciños, Cultural e Deportiva de San Xoán de Tirimol, da que son Secretario, a V Comida Veciñal de Tirimol, na honra á Nosa Señora do Rosario, cun amplo programa. Ás 13:00 horas houbo unha Misa Solemne na Igrexa Parroquial e procesión. A comida foi ás 14:15 horas no Campo da Festa, cuberto cunha carpa pechada lateralmente e a comida estivo amenizada pola actuación musical da Orquestra Alianza. Tamén houbo xogos inchables gratuítos para os nenos que asistiron e sorteouse unha viaxe para dúas persoas a unha casa de turismo rural entre tódolos asistentes. Ademais contamos coa asistencia do Alcalde de Lugo e de varios membros da Corporación Municipal do Concello de Lugo.

Como vedes tiven unha fin de semana completa, pero moi produtiva para min. E quero aproveitar a ocasión para felicitar aos compañeiros e compañeiras de Xuventudes Socialistas de Galicia, polo traballo que realizaron e que fixo posible esta nova escola de formación, á que sinto non poder ter asistido a xornada do domingo, pero as miñas obrigas impedíronmo. E tamén quero agradecerlle a tódolos socios e veciños de Tirimol que participaron na comida veciñal e que fixeron que fora un éxito. Porque a mellor recompensa que nos poden facer á organización é participar nas actividades que lles propoñemos e que gocen das mesmas.

Día de Acción Blog

Hoxe celébrase o Día de Acción Blog, día no que a blogosfera mundial debate simultaneamente sobre un asunto concreto. O obxectivo é establecer un diálogo mundial contando coas opinións e ideas de milleiros de persoas sobre un mesmo tema, este ano da pobreza. E despois da xuntanza de bloggers socialistas de hoxe e do que nos dixo a compañeira Mar Barcón, Secretaria de Organización do PSdeG-PSOE, quedoume claro que non podemos quedar calados ante o dato de que 800 millóns de persoas pasan fame no mundo. Así que isto nos debe de facer reflexionar a todos e todas.

E en relación a isto estou a recordar a imaxe que un ano máis nas festas do San Froilán puidemos ver das persoas que están a vender polas rúas de Lugo. Son centos de persoas que buscan un pouco de diñeiro para sobrevivir. E ante isto eu cuestiónome como pode haber quen pide que a policía actúe máis contundentemente contra eles, se a culpa non é destas persoas, senón das mafias que fabrican e trafican con prendas falsificadas e que se aproveitan da fame destas persoas. Así que a solución ao problema da fame que pasan moitas persoas pasa porque traballemos xuntos por un mundo máis solidario.

Xuntanza de bloggers socialistas

O vindeiro mércores 15 de outubro ás 16:30 horas na Sede Nacional do PSdeG-PSOE, que se atopa na rúa do Pino en Santiago de Compostela, celebrarase unha xuntanza de bloggers socialistas. A esta xuntanza asistirá a Secretaria de Organización, Mar Barcón.

Nesta xuntanza poderemos falar durante un rato sobre a blogosfera socialista en Galicia e poñer cousas en común. Ata o de agora algúns compañeiros e compañeiras xa confirmamos a nosa asistencia, como podedes ver no blog do compañeiro Blas García, a quen te tes que dirixir se queres asistir ou máis información.

I Asemblea Nacional de IESGA

Hoxe celebrouse a I Asemblea Nacional de IESGA (Iniciativa Estudantil Galega) no Paraninfo da Maestranza na Coruña. Os actos comezaron pola mañá coa apertura da Xornada por parte de Loli Rodríguez, Presidenta do Consello da Xuventude de Galicia. A continuación interviñeron Alberto Rodríguez e Isabel Lema, falando do movemento estudantil e da importancia das asociacións de estudantes nos órganos de goberno. Despois os compoñentes do Comité Fundador, Javier Fariña, José Manuel Lage, Fernando Martínez e Loli Rodríguez, coa ausencia desculpada de Xaime Méndez, explicáronnos a historia de IESGA e como, cando e por que nace unha organización estudantil progresista hai 12 anos.

Pola tarde celebrouse a Asemblea Nacional, onde os delegados e delegadas eliximos aos compañeiros e compañeiras que compoñen a Coordinadora Nacional de IESGA, aos que quero felicitar e desexarlles moitos éxitos no seu traballo, nela entraron os compañeiros da USC Mario, Adriana e Juanje. Despois a compañeira Azu Rodríguez presentou a nova páxina web de IESGA e a nova campaña de afiliación co lema “Participa”, porque participación é a palabra fundamental que describe o que é IESGA. Finalmente o peche realizouno a nova Coordinadora Nacional. E dende o meu blog quero aproveitar para agradecerlle aos compañeiros e compañeiras que traballaron e fixeron posible que se celebrara esta asemblea.

Festas do San Froilán 2008

Dende hoxe e ata o día 12 de outubro Lugo está de festa co San Froilán. Durante nove días os lucenses e os que nos visiten poderemos gozar dun amplo programa festivo con actividades para tódolos gustos. Unhas festas que foron declaradas no ano 2006 como Festa de Interese Turístico Nacional e que como dicía Cunqueiro, “son as máis fermosas do outono galego”.

Nestas festas organizadas polo Concello de Lugo podemos ir a concertos, dar unha volta polo recinto feiral, comer o polbo á feira nas casetas, todos eles uns elementos que non poden faltar no San Froilán. E os nenos teñen o San Froilanciño cunha morea de actividades para eles. Así que como lucense invítovos a todos e a todas a que veñades a Lugo, porque o pasaredes moi ben.

Entre todos e todas faremos e teremos unhas felices festas.

Rematei as miñas prácticas

Hoxe rematei as miñas prácticas na Axencia de Emprego e Desenvolvemento Local do Concello de Lugo. E a miña valoración das prácticas é moi boa, porque profundicei especialmente no coñecemento das políticas da Unión Europea e dos proxectos que se cofinancian con fondos europeos. Podo tamén indicar que adquirín unha visión ampla da Administración Local e das súas funcións. Algo que me proporcionou a realización da colaboración en preparación e xustificación de proxectos en emprego, planificación estratéxica e desenvolvemento local.

E teño que dicir que este último día das prácticas foi un momento triste e alegre á vez. Triste porque me tiña que despedir dos meus compañeiros, aínda que en canto poida volverei pola axencia para facerlles unha visita. E alegre porque puiden coñecer a uns excelentes profesionais, que día a día me axudaron con toda a súa boa predisposición e amabilidade a aprender moitas cousas, que me serán de moita utilidade. E desta maneira fixeron que durante este tempo me sentira como se estivese na miña casa.

Nunca esquecerei estes meses cos meus compañeiros, Isabel, Montse e Servando, que son os que están na axencia, e dos compañeiros e compañeiras que están no Centro de Empresas e Innovación (CEI-NODUS), no Centro de Orientación Laboral, na Escola Obradoiro “Escola Solidaria”, no Plan PILES e da Concelleira de Economía e Emprego, Sonia Méndez, que é a responsable de todos estes servizos. A todos eles lles quero agradecer o ben que me trataron e que me fixeran sentir como un membro máis do equipo.

O estado do concello de Lugo

Onte celebrouse no Salón de Plenos do Concello de Lugo o primeiro debate sobre o estado do concello. Na súa intervención o Alcalde destacou que "Lugo atópase nun momento espléndido de transformación e de modernización e vive un momento de cambio evidente, froito do traballo de moitos ao que non é alleo o Concello mediante as xestións e accións do Goberno Municipal que presido". E isto é algo evidente, aínda que por moito que o intente a oposición, a realidade de Lugo non se pode negar, porque a vemos tódolos días os cidadáns e ben sabemos que as verbas do Alcalde de Lugo son certas.

Porque hai moitos proxectos que xa están realizados, como a nova estación de mercadorías no Ceao, o desdobramento da Campiña, os accesos do Ceao, o novo acceso ao barrio da Piringalla por Mar Cantábrico coa nova pasarela sobre a N-VI, iluminación da N-VI, Ceao-Tolda e o acceso a Garabolos, todas as travesías dos Convenios asinados con Fomento, os convenios co Ministerio de Defensa e coa Consellería de Vivenda e Solo, que posibilitaron que se estea a facer o Parque empresarial de As Gándaras...

E hai moitos máis proxectos que están en marcha e se están a realizar como a nova potabilizadora e a nova depuradora cos estanques de tormentas e saneamento integral das dúas marxes do río Miño, a I fase do Plan Paradai e a II que a está a levar a cabo a Deputación Provincial, a Ronda Leste, acceso ao novo Hospital e os viais perimetrais do mesmo que financia o Concello, o Auditorio, a nova Ponte, o Cetal, o Centro Asociado da UNED, os tramos das autovías Lugo-Santiago, Lugo-Ourense ao seu paso polo Concello...

Tamén seguro que quedan moitas cousas por facer, como recoñeceu o Alcalde, e de que podemos e debemos seguir nesta dirección que nos fai avanzar cara diante. Pero a tarefa de construción dun concello moderno, exemplar e modelo para outros concellos, debemos facela entre todos e todas. Tanto a cidadanía, como o goberno e por suposto a oposición. Porque sen lugar a dúbidas, Lugo facémolo entre todos e todas e debemos de estar todos á altura das circunstancias polo ben de Lugo.

Hoxe tamén quero condenar rotundamente os atentados cometidos esta fin de semana pola banda terrorista ETA. Ademais quero mostrarlle a miña solidariedade a tódolos afectados polos tres actos terroristas destes dous últimos días no País Vasco e en Cantabria e especialmente coa familia do brigada Luis Conde, ao que lle quitaron a súa vida nun acto que non ten ningunha xustificación.

Programa km0 da Deputación de Lugo

Un grupo de 36 persoas da Asociación de Veciños, Cultural e Deportiva de San Xoán de Tirimol participamos onte no programa de visitas institucionais da Deputación de Lugo ‘km0. Deputación de Lugo’, unha iniciativa que é totalmente gratuíta para os participantes. Este programa leva implícita a recollida no punto de orixe, traslados, visitas guiadas e acompañamento por persoal especializado, xantar, organización e xestións, seguros e retorno ao lugar de orixe.

Primeiro visitamos o Pazo Provincial, que é a sede da Deputación de Lugo. No Salón de Actos déronnos unha explicación do Pazo da Provincia e logo fomos a ver o Salón de Plenos. Tamén nos saudou o Presidente da Deputación e entregáronnos documentación con información da ruta que iamos a realizar e uns obsequios. Despois visitamos o Mazo de Santa Comba. A continuación fixemos unha visita degustación a unha adega en Francos, un lugar situado en Doade, onde tamén nos deron o xantar. Logo fixemos unha ruta a pé ata miradoiro de A Pena do Castelo sobre o río Sil. Despois desprazámonos ata o embarcadoiro de Ponte do Sil, situado en Doade e fixemos unha travesía fluvial en catamarán contemplando as viñas de Amandi.

Dende ás nove e cuarto da maña e ata as oito da tarde os veciños de Tirimol que participamos nesta actividade pasámolo moi ben e descubrimos fermosos recunchos da nosa provincia. E como Secretario da Asociación Veciñal de Tirimol e persoa que solicitou esta viaxe quero felicitar e agradecerlle á Deputación Provincial de Lugo e ao seu Presidente, que leven a cabo esta importante e interesante iniciativa, que é pioneira en España, e que ten tres obxectivos claros: dar a coñecer aos lucenses o traballo do organismo provincial; potenciar a economía provincial e poñer en valor os nosos recursos naturais, empresariais e comerciais; e fomentar o orgullo de ser lucense.

Un disparate máis de Rajoy

Este vídeo recolle as disparatadas declaracións do líder do PP, Mariano Rajoy, manifestando que “180.000 extranjeros cobrando el seguro de desempleo y 20.000 españoles solicitando ir a trabajar fuera de España”. Deste xeito Rajoy quixo ilustrar a súa preocupación pola crise, que asegurou con estes datos. E o que fai é volver a relacionar o paro coa inmigración.

Ao dicir isto parece que Rajoy non sabe que os traballadores estranxeiros que cobran o desemprego tiveron que cotizar á Seguridade Social os períodos que establece a lei, xerando dito dereito. Un dereito que é igual para calquera persoa que traballe en España, independentemente do seu lugar de orixe. A cuestión é como pode o principal líder da oposición dicir unha cousa así e quedarse tan tranquilo.

Inxustiza económica cos concellos

Onte o xornal El Progreso recollía na súa portada que “El Concello de Lugo perderá un millón de euros si Solbes aplica su plan económico”. E ante este dato non é de estrañar que tanto o Alcalde de Lugo como o Presidente da Deputación lucense rexeiten a redución da aportación económica estatal aos concellos e sosteñan que, polo contrario, deberían recibir máis fondos para equiparse co resto de Europa.

Certamente a día de hoxe os concellos son os que máis servizos lle ofrecen á cidadanía. E os concellos con menos poboación, especialmente moitos concellos das provincias de Lugo e Ourense, están a pasar por dificultades económicas. E debemos de ter en conta que, para que os concellos poidan prestar os servizos que prestan na actualidade, deben de recibir o diñeiro que lles corresponde. Só deste xeito poderán levar a cabo as súas tarefas.

Ademais hai que ter en conta que os concellos están a prestar servizos que non lle competen, como a atención aos inmigrantes ou as garderías infantís e que, como asegurou o Presidente da Deputación de Lugo, se comparamos o seu gasto público co de outras administracións, resulta moi superior. Agora os cidadáns debemos de agardar que esta inxustiza cos concellos non se produza polo ben de toda a cidadanía.

Pimeiro Pleno on-line

Mañá celebrarase na Casa Consistorial de Lugo o Pleno correspondente ao mes de setembro. E como anunciou fai uns días á Concelleira de Servizos Xerais, Luisa Zarzuela, esta sesión do Pleno poderase ver en directo dende o portal web do Concello, facendo máis accesible e transparente para a cidadanía a información municipal, un obxectivo marcado polo actual Goberno Local. Deste xeito Lugo é o único Concello de Galicia que permite seguir en directo todo o que pasa no Pleno Municipal.

Nesta sesión ordinaria do Pleno vanse a tratar distintos asuntos, algúns deles de especial relevancia, como se pode ver na orde do día. Someterase a aprobación a renuncia á acta de Concelleiro de Francisco Fernández Liñares, que é o actual Presidente da Confederación Hidrográfica do Miño-Sil. E o Plan Xeral de Ordenación Municipal será outro dos asuntos que centre gran parte do debate, xa que hai distintas propostas dos grupos da oposición.

E como se pode ver estanse a producir uns cambios no Goberno Local debidos á marcha de Francisco Fernández Liñares. Isto fixo que o Alcalde nomeara a María Novo como nova Delegada de Urbanismo, sendo así a primeira Concelleira non electa ao amparo da Lei de Grandes Cidades. Ademais Lino González-Dopeso asumiu á Área da Zona Rural e agora é Concelleiro de Medio Ambiente e Zona Rural. E un cambio que falta é que Rosana Rielo asuma de novo o cargo de Concelleira de Xuventude, o que se producirá no Pleno do mes de outubro, cando recolla a súa acta de Concelleira. E quero aproveitar para desexarlles a todos eles o mellor nos seus novos cargos, que estou seguro que traballarán en beneficio de tódolos cidadáns.

El Progreso cumpre cen anos

Neste día tan especial para o xornal El Progreso de Lugo porque cumpre cen anos de vida, dende que en 1908 fora fundado por Purificación de Cora y Más-Villafuerte e como comentei fai uns meses nun comentario anterior no meu blog. Con tal motivo quero felicitar a El Progreso no ano do seu centenario e desexarlle que siga sendo o xornal de Lugo, tal e como o ven facendo dende 1908, e que nos siga acompañando nas nosas vidas moitos anos máis.

Estes foron cen anos de progreso, nos que moitas cousas cambiaron, nos que houbo importantes avances na sociedade, aos que El Progreso non foi alleo, xa que tamén os incorporou na súa tarefa informativa. E todo para seguir sendo o xornal que cada día máis lucenses lemos para estar informados do que acontece. Durante este tempo pasaron eventos moi importantes que lle afectaron á sociedade lucense e que puido recoller El Progreso nas súas páxinas. E todo este traballo non sería posible sen os profesionais que día a día fan realidade que saía á luz este xornal.

E neste ano do centenario El Progreso fixo un cambio de deseño que actualiza a súa imaxe. Pero segue a ser o mesmo xornal de sempre que nos informa e achega a actualidade alí onde nos atopemos. E como se aprecia no logotipo que conmemora esta celebración, El Progreso é como unha árbore informativa con grandes ramas e que está profundamente enraizado en Lugo. Unha árbore que seguirá medrando e proporcionándonos día a día a información do que acontece ao noso redor.

Intervención das XSG no Congreso

Este vídeo recolle a intervención de Loli Rodríguez, Secretaría Xeral das XSG, durante o 11 Congreso Nacional do PSdeG-PSOE. Unha intervención que afonda nos principios e valores socialistas. E teño que dicir que para min foi emocionante escoitar a nosa compañeira pronunciando estas verbas, que seguro que tamén emocionaron a tódolos compañeiros e compañeiras do noso partido.

Foi un discurso que destacou neste Congreso, que nos fai reflexionar e nos recorda que debemos seguir loitando polos valores socialistas e comprometernos cos mesmos. Uns valores como o republicanismo, o laicismo, o federalismo, o galeguismo ou a solidariedade. E recórdanos que debemos sentirnos orgullos por militar e compartir estes valores socialistas. E como dixo Loli, eu tamén quero rematar este comentario dicindo que, se cadra, a utopía non é un sono, é unha verdade prematura.

Finalizou o Congreso

Esta tarde rematou o 11 Congreso Nacional do Partido Socialista de Galicia. Nesta segunda xornada do Congreso a lista da Comisión Executiva do PSdeG recibiu o respaldo do 93,43% dos votos dos delegados e delegadas. Algunhas das novidades desta lista foron a creación do cargo de Vicesecretario Xeral, que será para Ricardo Varela, e o nomeamento dunha muller como Secretaria de Organización, a deputada autonómica e Concelleira de Urbanismo na Coruña, Mar Barcón.

Un Congreso no que se puxo de manifesto que o PSdeG-PSOE é o partido que está a cambiar Galicia, para que se converta nun país politicamente moderno, economicamente próspero e socialmente avanzado. E neste sentido Touriño dixo que o PSdeG é a forza capaz de transformar Galicia e de facelo a partir de ideas propias e dun proxecto propio, elaborado e desenvolvido en Galicia, nacido do diálogo coa sociedade galega e do compromiso cun ideario que se nutre continuamente dese diálogo.

Na foto podedes verme co meu compañeiro Suso e Adriana Viz, unha compañeira de Lalín que coñecín no Congreso e que tamén é unha blogguer. Nese momento estabamos na zona destinada aos bloggers. Na que vos podo dicir que houbo moita participación de compañeiros e compañeiras, que tamén quixeron comentar nos seus blogs o que acontecía neste Congreso.

1ª xornada do Congreso

Esta maña o meu compañeiro Suso e eu chagamos a Santiago de Compostela, onde deu comezo o 11 Congreso Nacional do PSdeG, que se celebra hoxe e maña no Pazo de Congresos e de Exposicións. O primeiro que tiven que facer foi recoller a miña credencial de blogger, que me permite acceder a calquera espazo do Congreso. E deste xeito podo contarvos o que acontece neste importante evento para o noso partido.

Un Congreso no que Emilio Pérez Touriño foi reelixido como Secretario Xeral do Partido Socialista de Galicia, co apoio do 97,37% dos delegados e delegadas presentes no Congreso. Nas urnas entraron 444 papeletas a favor e 12 abstencións, sen ningunha candidatura que se opuxese á oficial. Polo que Touriño acadou o apoio e a confianza para seguir catro anos máis á fronte dos socialistas galegos.

Este é o Congreso da revitalización e fortalecemento do noso partido para conseguir impulsar o proxecto do cambio político en Galicia. E está a ser un Congreso vivo, con debate e participación, onde a solución que se está a propoñer é máis e mellor Partido. Téntase avanzar nas seguintes liñas de acción política: fortalecemento do partido; potenciación do papel da militancia; revitalización do debate de ideas, do pluralismo e da democracia interna e participativa; apoio ás agrupacións das vilas e dos pequenos concellos; avanzar e dinamizar o cambio político en Galicia; e con vocación de acadar a maioría social en Galicia.

11 Congreso Nacional do PSdeG-PSOE

O 11 Congreso Nacional do PSdeG-PSOE terá lugar os días 26 e 27 de xullo no Pazo de Congresos e de Exposicións de Santiago de Compostela. Baixo o lema "A Forza de Galicia" celebrarase este Congreso, co desexo de ser cada día un partido máis útil para a sociedade galega, como dixo o Secretario de Organización dos socialistas galegos, Ricardo Varela.

Como novidade nesta edición os bloggers imos ter unha presenza importante e fundamental, xa que imos a ser os encargados de trasladar o desenvolvemento e as nosas opinións sobre o que acontece en cada momento no Congreso. Para o que a Organización habilitará unha zona WI-FI para arredor de 50 bloggers que faremos comentarios, propostas, e transmitiremos mensaxes on-line para os internautas.

O PSdeG é tamén pioneiro na creación dun blog, no que se amosa unha nova visión do Congreso e no que poderán participar os internautas enviando comentarios. E tamén hai unha web específica do 11 Congreso con información diversa e de interese, especialmente para os participantes no mesmo.

As miñas prácticas

Durante este verán estou a facer as prácticas no Departamento de Desenvolvemento Local do Concello de Lugo, unhas prácticas que realizo a través do Consello Social da Universidade de Santiago de Compostela. Así que durante tres meses, dende xullo a setembro, poderedes atoparme neste Departamento, que se atopa na Casa Consistorial, situado na praza Maior. Aínda que en pouco tempo nos trasladaremos para o edificio do antigo cuartel de Garabolos, lugar no que está o Centro de Empresas e Innovación.

Nestas semanas que levo estou cos meus compañeiros, Isabel, Montse e Servando, que somos os que estamos no Departamento, e contando coas visitas por motivos de traballo dos compañeiros que están no CEI (Centro de Empresas e Innovación) e noutros programas de emprego. E tamén se pasa polo Departamento a Concelleira de Economía e Emprego, Sonia Méndez, que ten un despacho onde leva os temas de emprego.

E estou a aprender moitas cousas e sobre todo grazas aos compañeiros, que me atenden moi ben e fan posible que cada día das prácticas me sexa de moita utilidade para min. Por iso lles quero agradecer a atención que me prestan cada día con toda a súa amabilidade. Xa vos contarei a evolución da realización das miñas prácticas. E se queredes facerme unha visita xa sabedes onde podedes atoparme durante estes meses, que eu estarei encantado de atendervos.

Propostas para o novo regulamento

A última reunión da Comisión encargada da elaboración do novo Regulamento de Participación Cidadá do Concello de Lugo celebrouse o 26 de xuño. Nesta reunión cada un dos asistentes e membros desta comisión expuxemos as nosas suxestións á proposta de borrador feita polo Equipo de Goberno. E agora a Concelleira Delegada da Área de Servizos Xerais e os técnicos municipais responsables de Participación Cidadá van a estudar todas as propostas que fixemos e ver se hai posibilidades para incorporalas.

Como representante das asociacións non federadas defendín a proposta de que inicialmente Lugo teña dous distritos, un rural e outro urbano, como propuxo o Goberno Local na súa proposta de borrador. E unha vez que se poñan en funcionamento os distritos e tendo en conta a súa operatividade habería que ver se son suficientes ou se habería que facer unha nova división en máis distritos. Pero en principio as asociacións non federadas pensamos que é mellor esta división en dous distritos. Especialmente porque as parroquias da zona rural do concello teñen unha problemática distinta á dos barrios da cidade. E o que non compartimos é a proposta realizada pola Federación de Asociacións de Veciños feita na Comisión de poñer en marcha catros distritos agrupando as distintas parroquias cos distintos barrios, xa que cremos que a zona rural ten distintos problemas aos da cidade.

E por último en canto á elección dos pedáneos habería que concretar antes a súa figura xurídica, posto que na actualidade son representantes do Alcalde nas distintas parroquias, polo que é o Alcalde quen os debe designar. E tamén nos preguntamos dende as asociacións non federadas da zona rural por qué o PP e a Federación piden eleccións democráticas de pedáneos e cando gobernou o PP non facían o mesmo, xa que o PP non convocou eleccións de pedáneos e a Federación non o demandou daquela.

37 Congreso do PSOE

Este vídeo recolle as principais pasaxes do primeiro discurso de Zapatero ante o plenario, durante o 37 Congreso do PSOE, antes de ser reelixido Secretario Xeral. O 98,5% dos delegados e delegadas do Congreso apoiaron ao presidente.

3 anos cambiando Galicia

Este é o vídeo conmemorativo dos 3 anos de goberno socialista en Galicia, posto que en xuño do 2005 os cidadáns galegos aportaron polo cambio. Tres anos despois os socialistas, forza motriz do cambio, podemos afirmar con orgullo que Galicia avanza, que ese ilusionante proxecto de transformación e modernización do país está a desenvolverse aceleradamente e con eficacia.

Lugo conseguiu o Plan Urban

Onte o Ministerio de Economía e Facenda concedeu o proxecto da Iniciativa Urbana de Lugo, coñecido como Plan Urban. Supón un investimento para a cidade de 16 millóns de euros, 8 millóns de euros procedentes de fondos FEDER, 1 millón de euros da Consellería de Economía da Xunta de Galicia, 3 millóns de euros da Deputación Provincial de Lugo e 3.942.000 euros do Concello de Lugo.

O traballo para a presentación desta iniciativa comezou xa en xullo do 2007 dende o Departamento de Desenvolvemento Local. A boa nova para Lugo chega no momento oportuno e demostra unha vez máis o resultado da xestión que se leva a cabo dende o Goberno Local. O Alcalde de Lugo, José López Orozco, destacou que á terceira vai a vencida e que outra vez conseguímolo entre todos.

E como lucense alégrome desta boa nova para Lugo e quero felicitar a tódalas persoas e entidades que co seu traballo e esforzo fixeron que este proxecto sexa unha realidade, especialmente as persoas que traballan no Departamento de Desenvolvemento Local e o Equipo de Goberno do Concello de Lugo.

Un político con futuro

Hoxe o xornal El País na súa edición de Galicia publica unha interesante entrevista a José Ramón Gómez Besteiro, Presidente da Deputación de Lugo. E recoméndovos que vexades esta entrevista a un político cun futuro prometedor, porque estamos ante unha figura emerxente dentro do PSdeG-PSOE e estou seguro que o tempo así o dirá. É un home traballador e unha persoa honrada, ao que lle desexo o mellor na súa vida política e profesional.

Día Mundial do Medio Ambiente

Hoxe conmemórase o Día Mundial do Medio Ambiente, que se ven celebrando o 5 de xuño de cada ano dende 1972, sendo o vehículo a través do cal as Nacións Unidas estimulan a concienciación sobre o medio ambiente a nivel mundial, ademais de promover a atención e acción política.

O lema seleccionado para este ano é “Deixa o hábito! Por unha economía baixa en carbono”. Entendendo que o cambio climático se está a converter no tema clave da nosa era, o PENUMA (Programa das Nacións Unidas para o Medio Ambiente) está facendo un chamamento aos países, empresas e comunidades para que se esforcen en reducir as emisións de efecto invernadoiro.

O Día Mundial para o Medio Ambiente ilustrará as distintas iniciativas, así como os medios para promover unhas economías e estilos de vida baixos en carbono, como por exemplo o uso de técnicas máis eficientes no uso de enerxía, fontes de enerxía alternativas, conservación dos bosques e consumo ecolóxico.

Felicitación ao IES Leiras Pulpeiro

A continuación póño o comentario que fixen para a Revista Lerias do Leiras co gallo da celebración dos dez anos de funcionamento do IES Leiras Pulpeiro de Lugo:

Como ex-alumno deste instituto quero manifestar que foi unha honra poder estudar e pasar unha etapa da miña formación neste centro educativo, no que para min foi e sigue sendo como a miña casa. Ademais, ao meu parecer, conta cun dos mellores equipos de docentes de Lugo. Docentes que, ademais de traballar, teñen unha relación próxima cos seus alumnos, polo que lles estaremos sempre moi agradecidos. Porque nos meus recordos están moitos momentos que pasamos xuntos alumnos e profesores, como se foramos unha familia. E tamén me lembro de moitas das actividades que se realizaban e nas que teño participado.

E síntome orgulloso de poder dicir que estudei no IES Leiras Pulpeiro, algo que sempre lle dicía ás persoas que lle querían atribuír ao noso instituto unha mala fama que, dende logo, para nada se merecía. E que hoxe en día xa ninguén pon en cuestión que sexa un centro exemplar. E isto podemos velo nos resultados académicos dos alumnos e alumnas, no importante número de actividades que se realizan, na súa organización e funcionamento, etc.

Por todo isto e como este é un ano especial para o instituto, porque cumpre dez anos de funcionamento, quero felicitar a tódalas persoas que estamos relacionadas con este centro educativo, especialmente a tódalas persoas encargadas de que día a día poida abrir as súas portas e realice as funcións que lle ten encomendado a sociedade. E como digo sempre, eu se teño fillos gustaríame que viñeran a este instituto, do que gardo tan bos recordos.

Novo portal web do Concello de Lugo

O Concello de Lugo presentou onte a súa nova Imaxe Corporativa municipal e o seu novo portal web que mantén o dominio lugo.es, pero que cambia totalmente de aspecto. Baixo o lema "Nova imaxe…a mesma paixón por Lugo", o Concello lucense moderniza a súa marca e tamén o seu portal de acceso a Internet para adaptalo aos novos tempos dunha cidade que avanza.

E quero felicitar ao Equipo de Goberno do Concello de Lugo, porque este portal web convértese nun portal moderno, dinámico e sobre todo máis accesible. Unha nova ferramenta para facilitar cada vez máis a comunicación entre o Concello e os cidadáns, xa que o novo portal incorpora novos trámites que facilitan as xestións coa Administración Local.

Neste senso de achegar as novas tecnoloxías á cidadanía o Concello de Lugo está a facer unha importante labor, xa que leva feito importantes iniciativas neste campo, como son o proxecto Lugo Dixital, o Blog do Alcalde, o envío de correos electrónicos ou de SMS coa información municipal, o Servizo de Información Municipal 010, os Encontros dixitais do Alcalde, os Cadernos de Lugo ou o programa Conéctate en Lugo.

Así que temos que seguir por este camiño e hai que seguir achegando a toda a cidadanía ás novas tecnoloxías. E hai que facer que toda a cidadanía teña a posibilidade de acceder a Internet, independentemente do lugar no que viva, para rematar coa "fenda dixital" que hai na nosa sociedade.

Pradolongo

Dende o 9 de maio xa podemos ver en Lugo Pradolongo, unha largometraxe galega na que participa Tamara Canosa, unha compañeira que protagoniza este filme de Ignacio Vilar con Rubén Riós e Roberto Porto. Así que desde aquí quero aproveitar para desexarlle moita sorte con esta película e darlle ánimos nestes días nos que está de promoción. E se aínda non a vistes, recoméndovos que a vexades.

Reforma do Regulamento de Participación Cidadá

A Lei 57/2003, de 16 de decembro, de medidas para a modernización do goberno local, fai que haxa que reformar o actual Regulamento de Participación Cidadá do Concello de Lugo para adaptalo a esta normativa vixente. E por este motivo o xoves pasado constituíse a Comisión encargada de elaborar e propoñer un novo regulamento, da que eu formo parte, xa que fun elixido por varias asociacións non federadas para que sexa o seu representante nesta Comisión. Nela participamos un representante do Goberno, un representante de cada un dos grupos que conforman a Corporación Municipal (PSdeG-PSOE, PP e BNG), os representantes do tecido asociativo (un representante da Federación de Asociacións de Veciños, un representante da Unión de Asociacións Veciñais e un representante de asociacións non federadas) e un funcionario municipal encargado da participación cidadá.

E quero felicitar ao Equipo de Goberno do Concello de Lugo por darnos esta posibilidade de participar nesta Comisión ás asociacións que nos estamos federadas. Porque dende o respecto que me merecen ás dúas federacións que hai en Lugo, teño que dicir que non nos representaban a moitas asociacións deste concello que non estamos federadas. E creo que esta razón non debe de impedir a nosa participación como representantes dos nosos asociados, que tamén son veciños e veciñas de Lugo que teñen dereito a que a ser escoitados e a participar nestas decisións que tamén lles afectan.

E tamén lles quero agradecer o apoio e a confianza que depositaron en min os meus compañeiros e compañeiras de varias asociacións non federadas para que as represente, e ás que lles quero indicar que traballarei dende a responsabilidade e escoitando a todas estas asociacións e trasladando a esta Comisión ás súas suxestións. Así que deste xeito poderemos expresar a nosa voz e colaborar na elaboración dun texto tan importante como é este Regulamento, o que é un elemento que fortalece a democracia e que fai máis representativas as decisións que se tomen.

Unha nova responsabilidade

Este sábado celebrouse a Asemblea Extraordinaria da Agrupación Local de Lugo de Xuventudes Socialistas, onde fun elixido como Secretario de Administración, Medio Rural e Universidade. Unha tarefa que se me encargou, que asumo con moita ilusión e ganas de traballo, á que lle dedicarei o meu esforzo para cumprir coas miñas obrigacións. E todo elo para facer realidade a miña intención de non fallarlles a tódalas persoas que confían en min.

Como sempre digo eu estou sempre a disposición de colaborar nas entidades nas que teño o pracer de participar. Como veño facendo en IESGA (Iniciativa Estudantil Galega), ou na Asociación de Veciños, Cultural e Deportiva de San Xoán de Tirimol, da que son Secretario. E por suposto, seguindo sempre os meus principios, sendo un deles o de diferenciar e separar o traballo que exerzo en cada unha das entidades nas que colaboro e querendo o mellor para a organización.

E xa sabedes que me tedes a vosa disposición para todo aquilo no que vos poida axudar. Así que tédesme ao voso servizo para calquera cuestión relacionada coas entidades nas que participo e nas que teño responsabilidades. Unhas responsabilidades que sempre tentarei cumprir e colaborar para o mellor funcionamento dentro destas organizacións. Finalmente agradézolle a tódalas persoas que confían en min para levar a cabo estas tarefas e que son as que me dan ánimos e forzas para seguir traballando.

O meu agradecemento

Quero agradecervos a tódolos compañeiros e compañeiras da Facultade de Ciencias Políticas e Sociais que me destes a vosa confianza para que fose o voso representante no Claustro da Universidade de Santiago de Compostela. Un agradecemento que tamén vos dou en nome de IESGA (Iniciativa Estudantil Galega) a tódalas persoas que nos apoiastes nestas eleccións.

E aínda que non conseguín obter os suficientes apoios para saír elixido, tédesme igualmente a vosa disposición para o que poida axudarvos. E tamén quero felicitar ás dúas persoas que saíron elixidas para ser as representantes do alumnado da Facultade de Ciencias Políticas e Sociais no Claustro Universitario, ás que lles desexo moita sorte no seu traballo.

Se queredes máis información sobre este proceso electoral ou saber quen nos vai a representar podedes velo no apartado dedicado a estas eleccións na web da USC.

O 24 de abril vota IESGA

POR UNHA UNIVERSIDADE PÚBLICA, DE CALIDADE, DE VANGARDA, NA QUE TI CONTAS, NA QUE TI DECIDES.

PARTICIPA. 24 DE ABRIL, ELECCIÓNS AO CLAUSTRO. VOTA IESGA.

Como candidato a representante de estudantes de 1º e 2º ciclo da Facultade de Ciencias Políticas e Sociais ao Claustro Universitario por IESGA (Iniciativa Estudantil Galega), quero pedirvos a vosa confianza nas eleccións do próximo día 24 de abril na Universidade de Santiago, para conseguir levar a cabo as nosas reivindicacións para o Claustro, que son tamén as túas reivindicacións. E, como di o noso lema, para conseguir unha universidade pública, de calidade, de vangarda, na que ti contas e na que ti decides.

O PRÓXIMO DÍA 24 DE ABRIL NON O DUBIDES...
VOTA INICIATIVA ESTUDANTIL GALEGA

Propostas de IESGA

Como comentei fai uns días nun comentario anterior no meu blog sobre as eleccións que vai a haber o 24 de abril na Universidade de Santiago, son candidato a representante de estudantes de 1º e 2º ciclo da Facultade de Ciencias Políticas e Sociais ao Claustro Universitario por IESGA (Iniciativa Estudantil Galega). E a continuación póñovos cales son as nosas propostas para conseguir unha universidade pública, de calidade, de vangarda, na que ti contas e na que ti decides.

As nosas reivindicacións para o claustro

> Aumentar o número de prazas de estacionamento e acadar a gratuidade das zonas azuis para o estudantado
> Aumentar o número de comedores universitarios e a calidade dos que xa existen
> Mellorar o convenio coa empresa ARRIVA e crear un convenio con RENFE para mellorar as redes de comunicación entre as diferentes cidades e os campus
> Unificar os servizos de promoción e asesoramento do estudantado para que fagan un traballo en rede que mellore a calidade deste
> Crear un espazo web no que se conteña toda a información relativa a cursos, congresos, bolsas, actividades culturais, etc., debidamente actualizado
> Dotar de cafeterías aquelas facultades que carecen deste servizo
> Aumentar a frecuencia de buses entre facultades con máis paradas, fundamentalmente a liña 15
> Ampliar e mellorar a información sobre o Espazo Europeo de Educación Superior e os cambios que supón na Universidade
> Adecuar as datas e horarios de xestión de matricula ás necesidades do estudantado (flexibilidade de prazos, apertura continuada en período de matrícula…)
> Revisar as concesións das reprografías e dos criterios para estas
> Acadar o posicionamento da universidade en contra da progresiva suba de taxas e privatización do sistema universitario
> Aumentar o número de ordenadores nas aulasnet das diferentes facultades, a apertura en horario ininterrumpido de 9:00 a 21.00 h. para que o estudantado poida acceder a eles en igualdade de condicións
> Realizar melloras no mantemento e nos servizos que se prestan no SUR (Servizo Universitario de Residencias)
> Diminuír a ratio profesor/alumno/a
> Asociar malos resultados na Enquisa Docente a cursos de adaptación pedagóxica obrigatorios
> Sistema progresivo no custo da matrícula do alumnado en función da renda familiar
> Eliminar a penalización por segundas e terceiras matrículas, ou calquera outro tipo de recargo e devolución dos cartos da matrícula cando por diversas causas nos vexamos obrigados a anulala
> Accesibilidade directa a todos os fondos das bibliotecas e equiparación do empréstito entre alumnado e profesorado
> Maior número de prácticas en empresas e institucións públicas en condicións laborais dignas e cun seguimento efectivo das tarefas realizadas e a súa adecuación á materia
> Dotación dos medios audiovisuais necesarios para que os labores docentes acaden a calidade axeitada
> Mellorar as webs dos centros e departamentos. Fomentar o software libre, adquirir equipos e modernización os actuais ata chegar a unha adecuada proporción de ordenadores útiles por alumno/a
> Uso adecuado dos números de móbil do alumnado para a distribución de publicidade, de modo que só se envíen cuestións de interese para este

Saúde e República!

Hoxe celébrase o día da República, porque o 14 de abril de 1931 proclamábase a Segunda República Española, sendo Éibar a primeira cidade na que se izaba a bandeira tricolor. E eu quero recordar esta data polo significado que tivo, porque tróuxonos dereitos tan evidentes e fundamentais desde a nosa perspectiva actual como o sufraxio feminino.

Foi unha loita pola consecución dos valores republicanos da Constitución de 1931, uns valores que seguen vivos e que defenden unha democracia mellor. Así que hoxe quero despedirme co cálido saúdo daqueles republicanos do 31: "Saúde e República".

Lingua de amor

Lingua de Amor é o concurso de declaracións de amor en galego a través do correo electrónico que por segundo ano organiza o Consello da Xuventude de Galicia a través do seu Servizo de Normalización Lingüística. Un dos principais obxectivos é dinamizar o uso da lingua galega por parte dos mozos e mozas nos novos espazos de comunicación: correos electrónicos, chats, foros...

E con motivo da celebración do Día das Letras Galegas e do Día Internacional da Internet, o CXG presenta este concurso que interrelaciona as novas tecnoloxías e a lingua galega. Unha iniciativa que trata de normalizar o uso da lingua entre a mocidade, e qué mellor xeito de facelo que conmemorando o Día das Letras Galegas a través de declaracións de amor.

Así que anímovos a que participedes nesta segunda edición de Lingua de Amor.

Eleccións na Universidade de Santiago

A Universidade de Santiago de Compostela ven de convocar o pasado 28 de febreiro as eleccións para a renovación dos representantes no Claustro Universitario e dos representantes nos consellos de departamentos que se celebrarán o 24 de abril. E hoxe publicouse na web da USC a Relación provisional de candidaturas ás eleccións parciais ao Claustro Universitario, ás cales me presento como candidato polo sector de estudantes de 1º e 2º ciclo na circunscrición da Facultade de Ciencias Políticas e Sociais pola agrupación electoral de IESGA (Iniciativa Estudantil Galega).

Eu entendo que a participación do alumnado na vida orgánica das universidades é un factor moi importante que axuda ao correcto funcionamento das mesmas. A representatividade dos estudantes nos órganos de goberno das universidades é un elemento democrático, que contribúe a achegar a nosa voz como estudantes a estes órganos, nos que se toman decisións importantes para toda a comunidade universitaria.

E dende esta responsabilidade e seguindo os meus principios e ideais preséntome como candidato na miña facultade por IESGA, que é a asociación de estudantes coa que estou colaborando. IESGA é un colectivo estudantil plural de orientación progresista interesado nas políticas educativas, na acción cultural innovadora e no desenvolvemento sustentable. E en cada centro goza de autonomía para desenvolver actividades, deste xeito estamos máis preto das necesidades reais dos e das estudantes.

Durante os próximos días seguireivos informando destas eleccións e quedo á vosa disposición para as consultas ou opinións que queirades realizarme.

Respectar as ideas dos demais

Despois de que pasaran estas eleccións xerais e de que manifestara no meu blog a miña preferencia política, houbo moitas persoas que libremente opinaron. Aínda que, como ben me indicaron algunhas persoas que falaron comigo, algún comentario era case un ataque as miñas ideas. Aínda que quen utiliza o ataque continuamente o que fai é que invalida o resto do seu discurso. Ademais eu non me teño que esconder de ninguén e son libre de expresar as miñas preferencias políticas no meu blog. E, xustamente, o que máis me agrada de ter un blog é poder compartir o que pensamos e que nos poidan deixar os nosos lectores a súa opinión. Así que eu non lle teño medo aos comentarios das persoas que visitan o meu blog. Por todo isto quixen ter un blog, un espazo para poder compartir e escoitar a opinión dos demais. Unha fiestra aberta a todos e todas na que poidamos opinar e, por suposto, opinar libremente.

Polo que respecto tódalas opinións, xa sexan a favor ou en contra da miña posición. Ademais eu, que defendo firmemente a democracia e a liberdade de expresión como un principio básico da mesma, creo que todos e todas podemos opinar. E neste sentido o filósofo francés Voltaire dicía: “Non comparto as túas ideas, pero daría a miña vida para que poidas expresalas”. Ademais estou convencido de que ninguén ten a verdade absoluta, polo que eu teño en conta tódalas opinións. Así que tamén debemos de aceptar as críticas que nos fagan. Pero, como todos sabemos e así se reflexa nos comentarios que me deixan no meu blog, hai críticas construtivas e críticas destrutivas. E eu sempre lle dou importancia ao que realmente a ten, é dicir, doulle importancia aos comentarios que me axudan a mellorar. Así que as críticas destrutivas non lles presto atención, porque están feitas desde o ataque e non desde a reflexión e o espírito construtivo.

E en conclusión, o que podo dicir é que non merecen a miña atención aquelas persoas que non me respectan e que non respectan as miñas ideas. Porque aínda que parece que hai quen non o entende, pero estamos nunha democracia e somos libres para manifestar as nosas ideas. Así que agradezo os comentarios que se me deixan no meu blog, porque ademais é un dos fins principais que creo que debe de ter un blog, onde poidamos expresarnos libremente, pero sempre sen atentar contra a dignidade das persoas. Porque cando se chegue a pasar este límite entón non me quedará máis remedio que eliminar eses comentarios. Algo que agardo que non chegue a pasar e que manteñamos sempre este mutuo respecto.

Un Presidente para todos e todas

Intervención de José Luís Rodríguez Zapatero celebrando a vitoria electoral: "Hace 4 años, me dijisteis aquí mismo que no os fallara. No lo he olvidado un solo día y me he esforzado por estar a la altura de vuestra exigencia. He sentido vuestro apoyo en todos momento, aún más durante esta campaña, y en especial en esta jornada. Habéis trabajado duro. Hemos trabajado duro. Ha merecido la pena. [...] Los españoles han hablado con claridad y han decido abrir una nueva etapa. Una nueva etapa sin crispación, una etapa que excluya la confrontación, una etapa que busque el acuerdo en los asuntos de Estado".

O domingo vota con todas as túas forzas

Quero animar a todos e todas a ir a votar o próximo 9 de marzo e a que votemos con todas as nosas forzas. Porque temos que decidir entre os que crispan e manipulan a verdade, ou o progreso e o futuro. Porque non é o mesmo que goberne Rajoy, ou que goberne Zapatero e, deste xeito, o noso futuro está en xogo.

Un momento moi especial para min

Onte o PSdeG-PSOE celebrou un acto electoral na miña parroquia, no Local Social de Tirimol. No acto interviñeron José López Orozco, Alcalde de Lugo; Carmen Basadre, Concelleira de Muller, Servizos Sociais e Xuventude; e Francisco Fernández Liñares, Concelleiro de Urbanismo e Zona Rural. E tamén os acompañamos José Piñeiro, Concelleiro de Infraestruturas; Manuel Flores, Pedáneo de Tirimol; e eu, como militante de Xuventudes Socialistas. Con este acto quixemos achegarlles aos veciños e veciñas de Tirimol as propostas do noso partido para as próximas eleccións xerais e pedirlles a súa confianza.

E quero darlles as grazas a tódolos veciños e veciñas que asistiron a este acto. E especialmente quero agradecerlles a José López Orozco, Carmen Basadre, Francisco Fernández Liñares e José Piñeiro a súa visita. Tamén lles quero agradecer aos meus compañeiros de Xuventudes Socialistas, Shirley, Suso e Anita, que me acompañaran neste momento. Moitas grazas compañeiros. Grazas a todos e todas, porque fixestes posible que este momento fora moi especial para min. Entre outras cousas, porque nos visitou un dos políticos aos que máis admiro e que para min é o mellor Alcalde para Lugo. Sen lugar a dúbidas, este foi un dos momentos máis emocionantes para min nesta campaña electoral.

Comparar é bo

Máis empregos e de maior calidade. Máis igualdade. Máis dereitos. Máis axudas ás familias. Maiores facilidades para acceder á vivenda... Son algúns dos efectos da xestión do Goberno de José Luís Rodríguez Zapatero. Estes son os principais datos comparados cos que lograron os gobernos do Partido Popular. E este vídeo recolle algúns destes datos do balance do feito en España no período 2004-2008. E por todo isto anímovos a consultar as propostas que se recollen no programa electoral do PSOE para os próximos catro anos. Porque comparar é bo...

Non se parecen en nada

Cada día somos máis os que estamos desexando que chegue o 9 de marzo para votar con todas as nosas forzas, aínda que non sexa a nosa primeira vez, pero seguimos conservando a mesma ilusión. Porque como vemos no vídeo afortunadamente os políticos non se parecen en nada e mentres un representa o pasado e o medo, o outro representa o futuro e o optimismo. E ademais temos motivos para crer e apoiar un proxecto de futuro, para que España siga mellorando como o fixo nestes catro anos.

E ti, que queres ser de maior?

Este é o vídeo que presentaron as Xuventudes Socialistas de Galicia dentro da súa campaña para as eleccións xerais do 9 de marzo. Neste acto tamén se presentou o novo blog de campaña das XSG. Este novo espazo na rede pretende ser un lugar dende o que a mocidade galega poderá coñecer tódalas iniciativas que dende as Xuventudes Socialistas se pretendan levar adiante, para tentar conformarse coma un novo foro na rede.

Defender a alegría

Nesta canción da Plataforma de Apoyo a Zapatero están defendendo a alegría, porque temos que defender a alegría contra os "cenizos".

O que ten ser positivos

Os acontecementos que se nos presentan na nosa vida cotiá poden ser vistos por nos de varias maneiras e unha delas é sendo positivos. Trátase de enfrontarse aos problemas estando convencidos de que somos capaces de atopar unha solución e de resolvelos. Cunha mirada positiva podemos facer moito máis sinxelo e agradable o proceso para chegar á solución. E sendo negativos e pesimistas é moito máis complicado ese camiño. E isto é algo que se aprecia moi ben no ámbito da política.

Tamén temos que ter en conta as persoas que nos rodean, xa que se as estamos implicando nestes problemas. Polo que debemos de pensar en todas estras persoas que nos apoian e que confían en nos. O que é unha razón moi importante para ser positivos. Como di José López Orozco, Alcalde de Lugo e un político ao que admiro, o noso ánimo positivo tamén se contaxia ás persoas que nos rodean. E así podemos facer que estas persoas estean máis motivadas e que nos axuden na procura da solución ao problema que se nos presente.

Ser positivos crea seguridade, optimismo, forza, ilusión e ganas de traballar en nos e nas persoas que nos rodean. E desta maneira temos un camiño máis doado para atopar unha solución. E sendo negativos sería todo o contrario e teríamos máis posibilidades de levarnos ao fracaso, xa que os malos augurios non conducen a nada bo. Por todo isto estou convencido de que ante os retos que se nos presentan é moito mellor ser positivos.