Unha Deputación que aposta polo rural

O Deputado da Área de Cooperación e Asistencia aos Concellos, Álvaro Santos, fixo un balance sobre as obras de mellora no rural que a Deputación de Lugo levou a cabo neste último ano. O organismo provincial continúa na súa liña de axuda ao rural e investiu na convocatoria pasada mais de 2.300.000 euros en obras de mellora de espazos nas vilas e concellos máis rurais da provincia. Esta partida, que está reflexada nos orzamentos da institución, responde ao Plan de Axudas ao medio rural, que conta con 300.000 euros, e ao Plan de Comunidades Veciñais, con máis de 2 millóns.

O primeiro proxecto é o Plan de Axudas ao medio rural que conta con ata 300.000 euros, asumidos na súa totalidade polo ente provincial e que van dirixidos a asociacións de veciños e gandeiros para levar a cabo obras de acondicionamento nos núcleos máis rurais da provincia. Este ano foron 59 asociacións de 48 concellos diferentes as que desfrutaron destas axudas dirixidas a mellorar accesos rurais e explotacións, acondicionamentos de fontes e cercados de pastizais, puntos de recollida de plástico e tamén para a construción de curros para o gando. O custe destas obras, que ascende a 300.000 euros, é asumido integramente polo organismo provincial quen xa inclúe esta partida económica nos seus presupostos anuais. 

O Plan de Comunidades Veciñais é outro dos programas de acondicionamento de espazos e servizos que propón a Deputación de Lugo. Esta iniciativa está deseñada para entidades asociativas de 67 Concellos da provincia e que lles permite executar máis de 200 obras de mellora e dotación de servizos e equipamentos públicos. Este plan conta cun presuposto de 2 millóns de euros que están reflexados nos orzamentos do organismo provincial. O ano pasado acolléronse a este plan 230 particulares e asociacións de toda a provincia que realizaron proxectos que van dende a dotación de mobiliario para locais sociais ata o acondicionamento do firme en núcleos rurais, pasando polo adecentamento de zonas de uso común para os veciños.

A Deputación de Lugo, a través destes proxectos, pretende mellorar as infraestruturas do rural ao tempo que liberar aos gandeiros e veciños dos custes destas obras. Fundamentalmente pódese dicir que a finalidade dos programas responden a 3 funcións ben definidas:

1- Impulsar o sector primario: a situación deste sector na provincia de Lugo está en perigo e logo das subidas do IVE, os custes destas obras prexudicarían gravemente os orzamentos dos gandeiros e agricultores. A través destas iniciativas, o organismo provincial, libera aos traballadores destes custes, facilitándolle así o traballo e brindándolle a posibilidade de que destinen máis recursos a esta actividade comercial, un dos motores económicos da provincia lucense.

2- Combater a taxa de paro: a provincia empezou o ano 2013 con preto de 30.000 parados, 2.500 máis que no ano anterior. Estas obras de acondicionamento contribúen a manter postos de traballo, posto que son os autónomos e as PEMES da comarca as encargadas de acometer as obras.

3- Frear o despoboamento do rural: O éxodo rural é constante. No 40% dos municipios hai moitos máis homes que mulleres e nenos, o que fai perigar a existencia dos Concellos. Os plans o que buscan é mellorar a calidade de vida dos lucenses, sobre todo de aqueles que viven nas zonas máis rurais da provincia para tentar evitar estes fluxos migratorios.

A Xunta malgasta diñeiro

Dende a Agrupación de Asociacións Veciñais de Lugo (AgrupaLugo) consideramos que a Xunta está malgastando 145.000 euros en levar a roupa do Hospital Universitario Lucus Augusti para lavala na Coruña e volvela a traer a Lugo, cando este hospital carece dos servizos de Hemodinámica, Radioterapia e Medicina Nuclear.

Mentres a Xunta gasta esa importante cantidade de diñeiro, na provincia de Lugo seguimos sen uns servizos sanitarios básicos no HULA e a pesar do clamor da cidadanía solicitando estes servizos.

No momento en que se inaugurou o HULA explicouse que era un dos hospitais máis modernos e que melloraría a atención sanitaria, pero isto parécenos un engano, mentres se continúe sen prestar uns servizos imprescindibles.

Ademais hai que ter en conta que posta en funcionamento deste servizos sanitarios aforraríase unha cantidade importante de diñeiro, atenderíanse aos pacientes nun menor tempo e en mellores condicións. E o máis importante sería que se reduciría o risco de falecemento.

Por todos estes motivos dende AgrupaLugo continuaremos realizando as accións que sexan necesarias para reclamarlle á Xunta uns servizos sanitarios básicos para a provincia. Ademais tendo en conta que Lugo é unha das provincias máis avellentadas, non só de Galicia, senón tamén de España, a dotación destes servizos aínda é máis necesaria se cabe.

Aproveito a ocasión para volver a solicitar a inmediata posta en funcionamento dos servizos de Hemodinámica as 24 horas, Radioterapia e Medicina Nuclear no HULA.

O meu aval

Onte dinlle o meu apoio ao compañeiro José Ramón Gómez Besteiro co meu aval para que sexa Candidato á Secretaría Xeral do PSdeG-PSOE, porque é un político dos que reivindica máis que nunca a Política con maiúsculas. Realiza unha posta firme polo diálogo, a participación e a transparencia, que nestes momentos son tan necesarios. Para el os problemas son oportunidades e o partido, o medio para transformar a sociedade.

A historia tamén avala o traballo de José Ramón, que comezou a militar no PSdeG-PSOE con 31 anos e formou parte do primeiro Goberno progresista na historia democrática da cidade luguesa tras décadas de gobernos populares. O 14 de xullo de 2007 chegou á Presidencia da Deputación de Lugo, presidida por vez primeira por un socialista. Nas eleccións municipais de 2011, Lugo foi o único caso en España en que o PSOE gañou tanto o Goberno da provincia como o da capital. Daquela, revalidou o apoio da cidadanía para liderar a única Deputación cun presidente socialista en Galicia.

O seu compromiso persoal e político obrigouno a dar un paso adiante para liderar un novo proxecto de partido, no que lle gustaría contar con todos e todas. Despois de percorrer preto de 6.000 quilómetros e coñecer en primeira persoa os compañeiros das agrupación locais, hoxe síntese con máis forza que nunca para seguir loitando por un futuro mellor.

José Ramón demostrou que cre neste partido e cre no que ten que ofrecer á sociedade galega: un proxecto político claramente definido baseado na igualdade, na xustiza social e na solidariedade. E aínda está máis seguro de que o PSdeG-PSOE é a única alternativa de goberno capaz de construír un modelo de progreso social e económico distinto ao actual desde o compromiso, a coherencia e a responsabilidade.

E fai agora 5 anos que xa dixen no meu blog que José Ramón era un político cun futuro prometedor, porque consideraba que estabamos ante unha figura emerxente dentro do PSdeG-PSOE e o tempo demostrou que non me equivocaba do que vos dicía. E hoxe volvo a repetir o que vos dixen daquela, porque é un home traballador e unha persoa honrada, ao que lle desexo o mellor na súa vida política e profesional.

Por todos estes motivos xa ten o meu aval e, se pensades o mesmo ca min, recoméndovos que tamén lle deades o voso aval, porque estou seguro de que non vos defraudará.  Na web http://gomezbesteiro.com tedes máis información de como podedes facelo.

Plan de Emprego en Lugo

O Alcalde de Lugo, José López Orozco, e a Concelleira de Economía, Emprendemento e Autónomos, Sonia Méndez, presentaron a segunda edición do programa experimental de fomento do emprego que nesta ocasión conta cun aumento do 8% no presuposto e no tempo de contratación das persoas en situación de desemprego. Así, nesta segunda edición, contará cun presuposto de 325.000 euros e un tempo mínimo de contrato de 6 meses. O Concello de Lugo leva 13 anos desenvolvendo programas de emprego cos seus propios recursos económicos. Primeiro foi o Plan PILES, que se desenvolveu entro o ano 2000 e o 2011, e en 2012 levouse a cabo a primeira edición do Programa Experimental de Servizos Locais e Fomento de Emprego, en substitución do anterior plan.

Ante o aumento das persoas en situación de desemprego, en Lugo xa son 10.500, e a falta de axudas por parte da Xunta de Galicia, o Concello que non é alleo aos problemas vese na obriga de aumentar o presuposto deste plan aínda que non sexa da súa competencia. Neste sentido, debemos recordar que o Real Decreto do Goberno Central impide a contratación de persoal por parte das administracións locais e, polo tanto, desenvolver determinados programas de inserción laboral como o PILES. Tamén é destacable dende que o señor Feijóo é Presidente da Xunta de Galicia nunca lle concedeu ningún programa de emprego nin escola-taller ao Concello de Lugo, algo que nunca antes sucedera.

Isto demostra que para o equipo de goberno do Concello de Lugo o emprego é un compromiso, porque a pesar de que o Concello non ten competencias en materia de emprego pero non permanece pasivo ante a situación do incremento de desempregados e da supresión de medidas de fomento de emprego por parte da Xunta e do Goberno Central.

Este plan especial busca tres obxectivos fundamentais: a creación de novos postos de traballo e mantemento dos xa existentes; favorecer ás pequenas empresas locais, dándolles ocupación durante 6 meses e, ao mesmo tempo, levar a cabo diferentes actuacións de interese público en cinco áreas diferentes. Para as empresas participantes é requisito fundamental que dispoñan de local ou nave no termo municipal de Lugo.

O programa conta cun orzamento de 325.000 euros que se distribuirán en 5 proxectos de actuación diferentes que se adxudicarán a través de procedementos negociados. Así, un dos programas é para o servizo de infraestruturas, que terá como tarefas o arranxo de beirarrúas, vados e outras necesidades dos diferentes barrios da cidade. Outro dos programas é para o servizo de Medio Ambiente, no que se levarán a cabo desbroces urbanos, mantemento de xardíns e do inmobiliario urbano entre outros. Un terceiro para o servizo de Deportes para a realización de mantemento e reparación de instalacións deportivas. Un cuarto para a zona rural, que se encargaría entre outros actuacións dos desbroces e arranxos de espazos públicos como fontes ou escolas. E un último para o servizo de Educación no que se desenvolverán tarefas de reparación dos colexios. Todas estas necesidades de mantemento dos espazos públicos exceden á capacidade de recursos humanos existentes no Concello de Lugo polo que servirán non só para dar traballo a parados de longa duración senón tamén para contribuír á permanencia de empresas locais e levar a cabo actuacións de interese municipal.

O único requisito para presentarse é que cada empresa deberá contratar a un mínimo de 4 persoas en situación de desemprego (2 xa existente en cada empresa, e 2 de nova contratación). Co que se garante emprego para un mínimo de 20 persoas en situación de desemprego durante, polo menos, un mínimo de 6 meses que é a duración estimada de cada unha das actuacións, aínda que a previsión é que sexan máis os traballadores porque o compromiso de contratar o maior número posible de parados será o que rexe o criterio de adxudicación.

Programa Satelízate

A Deputación de Lugo dá un paso máis no seu esforzo por xeneralizar o uso das novas tecnoloxías na provincia co dobre obxectivo de mellorar a calidade de vida dos veciños e impulsar o desenvolvemento económico para crear emprego e fixar poboación. Deste xeito, pon en marcha o programa Sateliz@te, unha nova liña de axudas encamiñada a potenciar o acceso a Internet na zona rural, a través do que o organismo lugués custeará a conexión vía satélite a uns 800 veciños, asociacións sen ánimo de lucro e PEMES. Este proxecto conta con 385.000 euros da Unión Europea para o seu orzamento e financiará a dotación de banda longa a zonas de sombra da provincia, aquelas onde non existe a posibilidade de contar con outro tipo de cobertura.

Cada beneficiario do programa Sateliz@te recibirá unha axuda que cubrirá o 100% do custe da antena, a súa instalación e os equipamentos precisos para a conexión, como pode ser un router. A contía máxima de cada subvención será de 500 euros. O usuario deberá asumir despois o mantemento do servizo, aínda que a Deputación de Lugo garantirá tarifas vantaxosas, pois pactará o subministro con varias operadoras de telecomunicacións. A velocidade de Internet da que dispoñerán será dun mínimo de 2 Mb, mentres que o máximo dependerá do tipo de contrato que o usuario formalice coas empresas colaboradoras coas que contará a institución luguesa, aínda que podería chegar aos 12 Mb.

Os destinatarios das axudas poden ser particulares, asociacións sen ánimo de lucro, ou ben pequenas e medianas empresas, que residan ou desenvolvan a súa actividade na zona rural da provincia, é dicir, todo o territorio lucense, a excepción do perímetro urbano definido como tal no Plan Xeral de Ordenación Municipal (PXOM) de Lugo, e que non dispoñan de cobertura de banda longa de polo menos 2 megas mediante outra tecnoloxía.

Dado que o orzamento total do plan de acceso a Internet rural Sateliz@te é de 385.000 euros e que a contía de cada subvención non superará os 500 euros, os beneficiarios poderán ser un mínimo de 770 particulares ou entidades.

Unha vez aprobada na Xunta de Goberno a execución do programa, así como as bases e modelos que rexerán o procedemento de concesión de subvencións, a Deputación de Lugo realizou o proceso para seleccionar ás empresas colaboradoras. Estima que o prazo de solicitude das axudas se abrirá a principios de xullo, aínda que informará puntualmente da data exacta en canto estea fixada a través da súa web www.deputacionlugo.org.

Outro ataque á Sanidade Pública

A Xunta impuxo primeiro o repago farmacéutico, obrigando a 120.000 lucenses a pagar, por primeira vez na historia, as súas menciñas, coa única finalidade de ingresar nas arcas do Goberno galego ata 7 millóns de euros, procedentes das pensións máis baixas no país: as dos veciños de Lugo. Agora, Feijóo decidiu que máis de 40.000 galegos que necesiten dende próteses, oculares ou audiófonos para o benestar e calidade das súas vidas teñan que pagar, tamén por primeira vez, e por adiantado, o 100% do custe destes dispositivos, superando nalgúns casos os 4.000 euros. Deste xeito, os gobernos do PP están a poñer fin á Sanidade Pública e ao Estado do Benestar.

Ningún colectivo estará exento deste anticipo económico, de tal xeito que, as persoas menores de 30 anos con próteses amputadas, oculares ou audiófonos, deberán de pagar por primeira vez estes dispositivos. Ademais, nos casos nos que unha vez finalizada a necesidade, como pode ser o uso dunha cadeira de rodas, estes elementos tampouco serán devoltos para que poidan ser usadas por outros doentes afectados, tal e como se contemplaba no anterior convenio, mediante un sistema de préstamo mediado pola administración sanitaria autonómica.

Deste xeito, coa entrada en vigor do novo modelo de prestación ortoprotésica, dende o día 15 deste mes, a Xunta de Galicia xa non devolve o prezo do material subvencionado ao conxunto dos establecementos, senón que o fará de xeito individualizado con cada un destes elementos prescritos. Para elo, todos os usuarios, primeiro deberán de abonar o anticipo para logo poder solicitar ao departamento autonómico a devolución da contía subvencionada. Tal é así que, na orde publicada no Diario Oficial de Galicia (DOG), non figura nin cómo nin cándo se lles vai devolver o diñeiro aos usuarios. O SERGAS, eludindo así a súa responsabilidade, non aclara esta cuestión en ningún punto, e alega para elo, simplemente, que a implantación do novo sistema permitirá adaptar o catálogo de produtos galego ao estatal. Con todo, os expertos recoñecen que o prazo da devolución será elevado, pois en ningún caso será inferior ós cinco meses.

Debido á escasa información e precisión do Goberno Galego neste asunto, e tendo en conta que a norma remata de cheo coa prestación ortoprotésica, a nova medida xa suscitou o rexeitamento de diversos colectivos profesionais. É o caso da Asociación de Técnicos Ortopédicos de Galicia (ATOG), quen vén de denunciar publicamente que, ademais das citadas restricións inxustificadas, existen outras cuestións que se modifican e que repercutirán na economía dos usuarios, pois o custe destas prestacións pode superar nalgúns casos os 4.000 euros; un gasto demasiado elevado ó que moitas familias non poderán facer fronte hoxe en día.

Garantir a sostibilidade financieira do sistema sanitario público é un dos retos máis importantes que debe afrontar o noso país. Por tanto, permitir que o sistema sanitario se deteriore é a peor das políticas que pode levar a cabo un goberno, xa que supón poñer en risco a viabilidade do que é o principal instrumento de equidade e de redistribución da riqueza. Evitar a descapitalización do sistema sanitario público é un imperativo que se debe afrontar con urxencia, pero nunca se debe facer a costa de aplicar estas medidas que o degraden, como o copago farmacéutico, e que teñen un efecto negativo para a economía e a saúde dos cidadáns.

Festas de Tirimol 2013

Outro ano máis na parroquia de Tirimol celebramos as Festas Patronais de San Xoán, e dende o meu blog quero invitar a todos os meus veciños e ás persoas que nos visiten a que disfrutemos delas e pasemos uns días de ledicia cos nosos familiares e amigos.

Este ano os veciños e os visitantes poderemos gozar dun programa moi completo e variado, que conta con verbenas, unha exhibición de baile, pasarrúas, fogos de artificio, entre outras moitas actividades.

A Comisión de Festas agradece moi especialmente a todos os veciños e comerciantes o gran esforzo que fixeron colaborando para que as festas poidan seguir celebrándose. Tamén agradece ao Concello de Lugo e á Deputación de Lugo pola súa colaboración con estas festas.

Deséxovos a tódolos meus veciños e a todos os que nos visitedes estes días que pasedes unhas FELICES FESTAS!

PROGRAMA:

Sábado, 22 de xuño:
13:00 horas: Misa Solemne e procesión na Igrexa Parroquial.
14:00 horas: Sesión Vermú amenizada pola Orquestra LA BAMBOLA.
23:00 horas: Verbena amenizada pola Orquestra LA BAMBOLA e o Dúo SOMBRAS.

Domingo, 23 de xuño:
12:30 horas: Pasarrúas a cargo do grupo de gaitas OS MIÑOTOS.
13:00 horas: Misa Solemne e procesión na Igrexa Parroquial.
14:00 horas: Sesión Vermú amenizada pola Orquestra TRIUNFO.
23:00 horas: Verbena amenizada pola Orquestra TRIUNFO.
00:00 horas: Queima da Gran Fogueira de San Xoán.
00:30 horas: Exhibición de baile do Grupo profesional RITMO LUGO con 8 famosos bailaríns.

Luns, 24 de xuño: DÍA DO PATRÓN
13:00 horas: Misa Solemne e procesión na Igrexa Parroquial.
14:00 horas: Sesión Vermú amenizada polo Trío AREAL.
22:30 horas: Verbena amenizada polo Trío AREAL.
00:00 horas: Sesión de fogos de artificio.

Arde Lucus MMXIII

O Arde Lucus MMXIII celebrarase o venres 14, sábado 15 e domingo 16 de xuño. Durante estes tres días Lucus Augusti arderá de novo e recrearase o pasado romano da cidade de Lugo. Este ano acádase a duodécima edición desta festa e estará dedicada ás mulleres, formándose un novo grupo que dará a réplica ao Senado de Lucus Augusti.

O Arde Lucus é unha Festa de Interese Turístico Galego e creceu grazas ás ilusións, á alegría e o bo humor de todas as persoas que, dun modo ou outro, participamos nesta festa. A nosa cidade converterase de novo nunha urbe romana, porque retrocederemos no tempo para gozar do noso legado cultural e histórico en primeira persoa.

Neste Arde Lucus hai máis de 190 actividades, das que 55 son novidosas. Estas actividades conforman o programa desta nova edición da festa, que se celebrará desde este venres á tarde ata o domingo á noite e que está organizada polo Concello de Lugo.

Co Arde Lucus a cidade comezará a vivir tres días de intensa actividade nos que lucenses e visitantes poderemos disfrutar coa recreación da historia, das tradicións e da cultura romana. E como lucense invítovos a todos e a todas a que veñades a Lugo a disfrutar desta festa, porque o pasaredes moi ben.

Uns servizos sanitarios indispensables para Lugo

Este xoves día 6 de xuño ás 20:30 horas con saída diante da Delegación de Sanidade terá lugar a manifestación para demandar a dotación dos servizos de Hemodinámica as 24 horas, Radioterapia e Medicina Nuclear no Hospital Universitario Lucus Augusti. Nesta manifestación xa está confirmada a participación de máis de 120 entidades representativas da sociedade de Lugo.

Dende AgrupaLugo facemos un chamamento á cidadanía lucense para que participe nesta manifestación reclamando estes servizos sanitarios, porque coa posta en marcha deste servizos aforraríase unha cantidade importante de diñeiro, atenderíanse aos pacientes nun menor tempo e en mellores condicións. E o máis importante sería que se reduciría o risco de falecemento.

Ademais no momento en que se inaugurou o HULA explicouse que era un dos hospitais máis modernos e que melloraría a atención sanitaria, pero isto parécenos un engano, mentres se continúe sen prestar uns servizos indispensables como Hemodinámica, Radioterapia e Medicina Nuclear.

Todos xuntos temos que reclamarlle á Xunta de Galicia uns servizos sanitarios que son tan necesarios para a provincia. Ademais tendo en conta que Lugo é unha das provincias máis avellentadas, non só de Galicia, senón tamén de España, a dotación destes servizos aínda é máis necesaria se cabe.

Anímovos a tódolos veciños e veciñas de Lugo a que asistades á manifestación que se celebrará o 6 de xuño ás 20:30 horas con saída diante da Delegación de Sanidade na rúa Montevideo.

En defensa do IES As Mercedes

A Dirección Xeral de Formación Profesional, a través do Consello da Xunta de Galicia, acordou a través dun Decreto, de forma unilateral, a conversión do IES As Mercedes en Centro Integrado de Formación Profesional, sen contar, segundo todos os indicios, con ningún informe que avale tal acordo e sen sequera dar razóns e explicación algunha sobre o mesmo.

Con esta medida, a zona sur da cidade de Lugo queda sen un só Instituto de Ensino Secundario público no que se oferten ESO e máis os Bacharelatos de Ciencias e Tecnoloxía e Humanidades e Ciencias Sociais que, ata agora, se ofertaban no IES As Mercedes, para incrementar a masificación doutros centros da cidade.

Dende AgrupaLugo apostamos pola continuidade de ESO e Bacharelato neste centro e, por iso, decidimos formar parte da Plataforma Cidadá en defensa do IES As Mercedes, na que estamos presentes todas as federacións veciñais de Lugo, a Federación de Asociacións de Nais e Pais de Lugo e todas as ANPAs dos centros afectados.

Para esta Plataforma Cidadá a reivindicación da continuidade do IES As Mercedes é unha demanda imprescindible para esta zona sur da cidade de Lugo. E temos a seguridade que, se agora o cerran, non tardarán en ter que volver abrir. O compromiso desta plataforma veciñal é que non desistiremos, dende logo, ata que se produza a revogación ou conxelación de dito acordo e que se sigan mantendo no IES As Mercedes as ensinanzas de ESO e os bacharelatos ata agora ofertados.

O IES As Mercedes é un modelo de convivencia e integración de alumnos que estudan FP, ESO e BAC. O cambio que quere facer á Xunta de Galicia neste centro público prexudica ao conxunto da cidade e do ensino. Por iso, recoméndovos que participedes na manifestación en defensa do IES As Mercedes o próximo xoves 30 de maio ás 19:30 horas diante deste instituto.

Congreso #INLUGO

A Deputación de Lugo presentou o I Congreso de Cultura Dixital e Redes Sociais InLugo, un encontro que reunirá a elite de Internet na capital lucense os días 7 e 8 de xuño, situando á provincia luguesa á vangarda en materia de coñecemento e formación no ámbito dixital. Máis de 30 recoñecidos profesionais en España, de sectores como o xornalismo, turismo, tecnoloxía, emprego, marketing online ou acción social, cuxos blogs e redes sociais contan con miles de seguidores, compartirán nesta cita o seu coñecemento a través de varias ponencias e debates, nos que abordarán os cambios nos hábitos, mentalidades, formas de comunicación e estilos de vida que está provocando Internet na sociedade.

Tamén haberá espazo para a innovación e o emprendemento, coa presentación de proxectos nos que se empregan as redes sociais como medio de expresión e negocio, ou cunha mesa redonda na que se abordará como a Rede pode impulsar empresas ou produtos. Como colofón, este pioneiro encontro acollerá a entrega dos Premios INLUGO, cos que a Deputación recoñecerá o labor que están a realizar empresas lucenses no ámbito dixital.

Xa se adiantou o nome dalgúns dos expertos nacionais que se darán cita en Lugo o 7 e 8 de xuño. Entre eles atópanse: Mario Tascón, especialista en medios dixitais e redes sociais, así como ex director de elmundo.es e elpais.com; Sebastián Muriel, responsable de expansión internacional de Tuenti e ex director de Red.es (organismo estatal encargado do fomento de Internet e novas tecnoloxías); Óscar Reboiras, licenciado en periodismo e responsable do departamento de comunicación do operador galego de telecomunicacións R; Francisco Polo, un dos puntais do activismo na Rede, fundador de Actuable e director de comunicación de Change.org; Javier Pedreira (más coñecido como Wicho) fundador e autor de Microsiervos, o blog español máis popular da historia, ou Alfonso Alcántara (Yoriento), especialista en persoal branding, motivación e emprego 2.0.

Trátase dun encontro totalmente gratuito e para todos os públicos, cun primeiro aforo limitado de 160 persoas, que é a capacidade do Salón de Actos do Pazo Provincial, e un segundo aforo doutras tantas que o seguirá en directo dende o Salón de Pleno da Deputación. Por este motivo, é necesario a previa inscrición neste congreso. Para a participación, respectarase rigorosamente a orde de entrada das inscricións. Ademais, todos os interesados poderán seguir as actividades deste pioneiro Congreso a través de Internet grazas á colaboración dos profesionais da Fundación TIC, que se encargarán da súa emisión en streaming.

As persoas interesadas poderán formular a súa solicitude a partires deste martes, 21 de maio, na páxina web www.inlugo.com ou ben en www.deputacionlugo.org.

Tapóns solidarios

A iniciativa solidaria "Os Tapóns dan vida e coidan o medio ambiente" é posible grazas á colaboración da Fundación Puro Cora, o Concello de Lugo, a Deputación Provincial, o Colexio de Farmacéuticos de Lugo, a Asociación Española de Loita contra o Cancro de Lugo, Aspnais e as empresas Allplas, Prelo, Envialia e Contemar. Trátase dun banco de recollida de tapóns de plástico en toda a provincia, para recadar fondos co obxectivo de axudar a nenos e mozos con enfermidades graves e dependentes, ao tempo que favorece o coidado do medio ambiente coa reciclaxe destes materiais.

Como podedes ver neste vídeo, dende o primeiro momento esta iniciativa tivo unha gran acollida entre a sociedade lucense, pois en tan só uns días xa se sumaron á acción máis de 2.100 persoas no grupo da rede social Facebook e xa se levan recollidos máis de 21.000 quilogramos de tapóns de plástico. A primeira beneficiaria foi Uxía, unha nena que naceu sen unha man e cuxa nai recibiu un talón por valor de 2.600 euros correspondentes á unha primeira entrega de 10 toneladas de tapóns.

O convenio de colaboración que materializou o banco de tapóns asinouse o pasado mes de decembro nas instalacións do xornal El Progreso. Segundo recolle o propio convenio, a iniciativa está destinada a axudar a lucenses de entre 0 e 25 anos de idade, enfermos graves; con necesidade de asistencia mecánica para a súa mobilidade (cadeiras de rodas, prósteses...), ou cirurxías de implantes, ou ben, calquera outra que determine o Consello de Expertos nomeado para valorar os expedientes que se reciban. Este consello, acordado por todas as organizacións implicadas no proxecto, é un comité profesional formado por unha médica, unha psicóloga, unha farmacéutica e unha traballadora social, que se ocupará de analizar os expedientes médicos que se reciban e valorar a prioridade dos mesmos para destinar os fondos recadados coa recollida e venda dos tapóns de plástico.

Así que anímovos a participar nesta interesante iniciativa solidaria. Na prensa saen actualizados os puntos de recollida oficiais, onde poderedes depositar os tapóns. As empresas ou colectivos que se queiran sumar ao Banco de tapóns de Lugo, deben enviar un correo a recogidatapones@elprogreso.es. Se precisades máis información desta iniciativa podedes consultar o seguinte grupo en Facebook: https://www.facebook.com/groups/Bancodetaponesdelugo.

Ferramenta para xerar felicidade

Como podedes ver neste vídeo, as Nacións Unidas din que a mellor ferramenta para xerar felicidade na nosa sociedade é a Educación Pública. Eu estou totalmente de acordo con esa afirmación, porque síntome orgulloso de poder dicir que sempre estudei na Educación Pública, o que me deu a posibilidade de realizar os meus estudos. E como digo sempre, eu se teño fillos gustaríame que poidan estudar na Educación Pública.

Por iso, considero que é necesario denunciar os ataques que está a sufrir a Educación Pública por parte dos distintos gobernos do PP, para que a cidadanía se dea conta de que o que nos estamos xogando vai máis aló da economía, xa que o que realmente supoñen estes recortes é a redución de calidade no ensino público, ao ter menos profesores, e o incremento do fracaso escolar que leva aparellado.

Desde que o PP puxo de Ministro a Wert recortou 5.212 millóns de euros en Educación, situándonos á cola da OCDE e da Unión Europea. Porque despediu a miles de profesores e profesoras e masificou as aulas. Subiu brutalmente as taxas universitarias e recortou as bolsas e axudas ao estudo. Está a desmontar a Educación Pública e eliminando a igualdade de oportunidades no acceso ao dereito á educación. Quere implantar unha reforma á marxe da comunidade educativa. Unha contrarreforma regresiva, clasista, excluínte, privatizadora, antidemocrática e segregadora, que converte a educación nunha carreira de obstáculos e atenta contra o dereito a unha educación de calidade en condicións de igualdade. Os recortes e a contrarreforma educativa aproveitan a escusa da crise para implantar un modelo ideolóxico que supón unha volta ao sistema de ensino franquista e que aposta pola escola privada e concertada en detrimento de a pública.

Por todos estes motivos o próximo xoves 9 de maio haberá unha Folga Xeral no Ensino de estudantes, profesores, nais e pais contra a LOMCE. A Plataforma en Defensa do Ensino Público na que se integran IESGA e FETE-UGT, convoca manifestacións ás 19:30 horas nas catro provincias galegas con motivo desta Xornada de Folga que esta plataforma ven de convocar.

Tamén quero aproveitar este post para mostrar todo o meu apoio coa comunidade escolar do IES As Mercedes en Lugo e anímovos a asinar a petición solicitándolle á Xunta de Galicia a derrogación da medida que suprime ESO e BAC neste instituto, porque este centro público é un modelo de convivencia e integración de alumnos que estudan FP, ESO e BAC. Este cambio que quere levar a cabo a Consellería de Educación no IES As Mercedes prexudica ao conxunto da cidade e do ensino.

O xogo My Green Energy Planet

Con motivo do Día Mundial da Terra, que celebramos hoxe 22 de abril, WWF España e a Fundación AXA animan aos cidadáns a celebralo creando o seu propio planeta renovable en My Green Energy Planet. Este xogo de simulación online pretende concienciar e sensibilizar sobre a necesidade de construír unha realidade enerxética ambientalmente sostible e responsable para loitar contra o cambio climático.

Preservar a Terra dos impactos do cambio climático é posible e todos podemos contribuír ao cambio. Esta é a premisa de partida do xogo de simulación online My Green Energy Planet, desenvolvido por WWF e a Fundación AXA.

O reto deste 22 abril, Día Mundial da Terra, é animar aos internautas a que participen de forma activa na creación dun planeta renovable grazas ás accións que propón o xogo de simulación. Por exemplo, cambiando a forma de xerar e xestionar a enerxía por unha máis sostible, limpa, sen emisións de CO2 e respectuosa co medio ambiente, así como con accións de aforro e eficiencia enerxética en edificios, transporte e agricultura. Para logralo, cada xogador ten que aprender a xestionar os recursos enerxéticos do seu mundo virtual da forma máis eficiente e renovable posible, e actuar de forma responsable co medio, respectando as zonas de alto valor ecolóxico.

Todo iso debe facelo mantendo un equilibrio entre produción e consumo, coa posibilidade de comprar e vender enerxía nun mercado virtual. Ademais de crear un ámbito agradable para os cidadáns con accións como crear zonas verdes, carril bici, edificios eficientes, polideportivos e piscinas municipais que funcionan con enerxía solar fotovoltaica, granxas que aproveitan os seus residuos para xerar enerxía, pobos e aldeas con turismo ecolóxico rural. Todos estes cambios conseguen aumentar o indicador da satisfacción cidadá no xogo.

Para acceder a este xogo e crear un Planeta 100% renovable entra en: www.mygreenenergyplanet.com.

A pola Terceira República

Hoxe celébrase o Día da República, porque o 14 de abril de 1931 proclamábase a Segunda República Española, sendo Éibar a primeira cidade na que se izaba a bandeira tricolor. E eu súmome ao manifesto das Xuventudes Socialistas de Galicia e quero recordar esta data polo significado que tivo, porque tróuxonos dereitos tan evidentes e fundamentais desde a nosa perspectiva actual como o sufraxio feminino.

Dende ese momento e ata o estoupido da Guerra Civil xa non houbo pobo deste ou doutro rei, senón cidadáns. Xa non houbo máis príncipes nin princesas e si un único soberano: o pobo. A xustiza, a liberdade, a igualdade, a fraternidade entre os pobos... son principios que impregnan o ideario político dos e das cidadáns de esquerdas.

Foi unha loita pola consecución dos valores republicanos da Constitución de 1931, uns valores que seguen cada día máis vivos e que defenden unha democracia mellor. Por iso é necesario pór en pé un novo proxecto de país que poña no centro da súa política e a súa economía a participación activa e o benestar social da maioría, a democracia participativa e os dereitos sociais.

Todo isto chegará sen dúbida coa Terceira República.

Investigar a violencia de xénero

Dende a Agrupación de Asociacións de Veciños de Lugo (AgrupaLugo) lamentamos a morte da muller que presuntamente foi vítima dun grave caso de violencia de xénero no barrio da Milagrosa. Tamén mostramos todo o noso apoio coas vítimas deste tipo de actos violentos.

Condeno firmemente este caso e rexeito calquera tipo de violencia de xénero. Entre todos e todas temos que erradicar esta lacra para que casos, como o acontecido en Lugo, non se volvan a repetir.

As mulleres que sofren malos tratos deben presentar denuncia contra os seus agresores e a continuación teñen que poñerse en marcha tódolos mecanismos de protección necesarios, onde ten un papel primordial a Policía Nacional.

Dende a Confederación Española de Policía (CEP) informouse que dende o mes de outubro a Comisaría da Policía Nacional en Lugo deixou de ter un grupo de investigación da violencia de xénero, un feito que a AgrupaLugo nos parece moi preocupante, sobre todo despois de que unha muller morrera presuntamente por un caso de violencia machista.

Neste sentido, dende AgrupaLugo consideramos fundamental que a Comisaría da Policía Nacional conte cun grupo específico e encargado de investigar os posibles casos de violencia de xénero, porque os recortes e retrocesos na prevención e investigación da violencia de xénero poden ter graves consecuencias, como a sucedida este venres.

Por estes motivos, dende AgrupaLugo enviarémoslle unha carta ao Subdelegado do Goberno para solicitarlle que a Policía Nacional investigue os posibles casos de violencia de xénero e que a Comisaría de Lugo volva a contar cun grupo especializado de investigación para estes casos.

Teléfono de atención ás mulleres maltratadas: 016

Exemplos de boa xestión económica

Esta semana coñecemos varios datos que reflicten a boa xestión económica que están a realizar os gobernos da Deputación Provincial e do Concello de Lugo. Isto permite que o Goberno local e o provincial están aplicando recortes á débeda, pero non ás políticas sociais, como fan os Gobernos de Rajoy e Feijóo. O que demostra que hai outra maneira de gobernar e de xestionar o diñeiro das administracións públicas.

O Concello de Lugo acabou o exercicio de 2012 con máis de 13,5 millóns de euros de superávit e dispón dun remanente de tesourería de 21,5 millóns. Deste xeito o Concello cumpriu así o Plan de estabilidade e non ten que facer ningún axuste xa que, de novo, acabou o ano con saldo favorable, nun momento no que moitas administracións teñen dificultades económicas. Estas cifras veñen demostrar como se xestionan os cartos nesta administración e tamén son proba de que se fixo un presuposto ben deseñado, axustado á realidade de ingresos e gastos do Concello e desmenten as acusacións de que estaba inflado.

O resultado orzamentario de 2012 foi de 13.508.525 euros de superávit. Este saldo positivo é o resultado duns dereitos recoñecidos que ascenderon a 84.997.000 euros e unhas obrigas por importe de 78.105.000 euros. Este superávit nas contas municipais de 2012 supón que o Concello de Lugo dispoña dun remanente de tesourería por importe de 21.580.000 euros. A liquidación orzamentaria de 2012 foi presentada na Comisión especial de Contas do Concello como paso previo á súa aprobación na sesión plenaria que vai celebrar o vindeiro luns a Corporación municipal. 

Mentres o Pleno provincial aprobou este martes unha nova redución da débeda financeira da Deputación de Lugo por valor de 3,5 millóns de euros, que se suman aos 10 que xa estaban previstos no Orzamento de 2013. Deste xeito, con estes 13,5 millóns, conseguiuse situar o endebedamento da Deputación ao finalizar este 2013 nos 37,5 millóns de euros e, dende que entrou este Goberno provincial, hai 6 anos, rebaixouno en 52,2 millóns de euros, o que supón un 60%. Todo isto grazas a unha boa xestión, responsable e eficaz, na que combinou políticas de crecemento, que potencian o emprego e o benestar, con outras de contención do gasto.

Neste 2013 a Deputación de Lugo non ten que solicitar ningunha operación de crédito, polo que, por segundo ano consecutivo, conseguiuse endebedamento financeiro cero. En canto á execución orzamentaria do 2012, os informes de liquidación determinan que acadouse un 80%, un nivel moi satisfactorio, que supera en 10 puntos ó rexistrado na Deputación da Coruña, a única galega que, xunto á de Lugo, fixo público por agora o seu informe de liquidación do pasado ano.

A Hora do Planeta

O sábado 23 de marzo ás 20:30 horas cidadáns, institucións e empresas de todo o mundo apagaremos as luces durante unha hora, participando así na celebración do evento A Hora do Planeta organizado por WWF, transcendendo todas as barreiras de relixión, cultura, sociedade, xeración e localización xeográfica nunha celebración global polo Planeta.

No que posiblemente será a maior chamada á acción para loitar contra o cambio climático, a Hora do Planeta 2013 conseguirá que centos de millóns de persoas de pobos e cidades dos seis continentes apaguen a luz durante unha hora. Esta iniciativa pretende alcanzar o compromiso dun cambio global en beneficio do medio.

Ao animar a cidadáns, empresas e gobernos a comprometerse e actuar en favor da sostibilidade e demostrando tal compromiso ao apagar as luces durante unha hora concreta, a Hora do Planeta estará a lanzar unha poderosa mensaxe de esperanza do que podemos lograr se actuamos xuntos. Isto inspirará outros para que se unan ao obxectivo final de conseguir un mundo máis san.

A Hora do Planeta empezou nunha soa cidade dun país o 31 de marzo de 2007, cando 2,2 millóns de persoas de Sidney, Australia, apagaron as súas luces durante unha hora para reclamar accións contra o cambio climático. Un ano despois, 370 cidades de máis de 35 países converteron esta iniciativa nun movemento global pola sostibilidade, conseguindo que entre 50 e 100 millóns de persoas apagasen as luces na Hora do Planeta 2008. Edificios emblemáticos como a ponte Golden Gate, o Coliseo de Roma, Times Square ou o Cristo Redentor de Río de Janeiro uníronse a este chamamento de acción polo clima escurecéndose durante unha hora.

En Lugo o Concello e a Deputación sumáronse un ano máis a esta campaña, como unha mostra máis do seu compromiso coa loita contra o cambio climático e pola defensa do medio ambiente. Deste xeito a Muralla e o Pazo de San Marcos apagarán as súas luces exteriores para tomar conciencia do problema do cambio climático e coñecer a importancia da participación de todos e todas na defensa do medio ambiente.

E dende o meu blog quero aproveitar para animarvos a que vos sumedes a esta iniciativa e durante unha hora apaguemos as luces, deste xeito estaremos actuando contra o cambio climático.

Día Internacional das Mulleres

Hoxe conmemóramos o 8 de marzo, Día Internacional das Mulleres. Así que de xeito especial neste día quero recoñecer a gran importancia das mulleres na nosa sociedade. Porque a plena participación da muller na vida política, civil, económica, social e cultural en condicións de igualdade e a erradicación de todas as formas de discriminación por razóns de sexo teñen que ser sempre obxectivos prioritarios de toda a sociedade.

Desgraciadamente na actualidade as reformas e decisións tomadas a cabo polo Partido Popular agravan día tras día a situación familiar e laboral das mulleres, as grandes prexudicadas por estas políticas inxustificadas. Por iso é inadmisible este ataque directo aos dereitos da muller que está a levar a cabo o Goberno, poñendo a crise como escusa

Deste xeito súmome ás reivindicacións desta data e estou convencido de que este 8 de marzo, temos que celebrar todo o que queda por conseguir e que non queremos retroceder, porque froito do esforzo colectivo das mulleres do pasado e do presente, conseguíronse grandes avances, pero debemos ser conscientes de que aínda queda un longo camiño por percorrer. Temos que seguir dándolles todo o noso apoio na loita e defensa do feminismo, da Igualdade e dos dereitos das mulleres.

Xuntos temos que seguir traballando para conseguir a Igualdade efectiva entre as mulleres e os homes en tódolos ámbitos. Para que isto sexa unha realidade hai que seguir traballando no camiño da Igualdade, algo ao que sen dúbida entre todos e todas chegaremos. Porque levamos moitos anos reivindicando a Igualdade e avanzando moito, pero este 8 de marzo celebramos todo o que queda por conseguir e que non queremos retroceder nin un só paso atrás.

Hoxe e os 365 días do ano loitemos todos e todas pola Igualdade! Feliz Día das Mulleres!

Orzamentos participativos na Deputación de Lugo

O Presidente da Deputación de Lugo, José Ramón Gómez Besteiro, avanzou que o organismo lucense dará voz á cidadanía para elaborar uns orzamentos participativos. Deste xeito, converterase na primeira institución provincial de Galicia e a terceira de toda España en implantar este mecanismo, co que mellorará a calidade democrática e transparencia da súa xestión.

A Deputación está traballando xa para que este novo instrumento de participación cidadá se aplique nos próximos Orzamentos, os de 2014. Forxará unha relación de dobre dirección con todos lucenses: por un lado, coñecer de primeira man as súas necesidades e facelos partícipes da xestión provincial, dándolles voz á hora de definir os orzamentos: a folla de ruta dunha administración, en que establece as súas prioridades e obxectivos; e, por outro, explicándolles para que serve esta institución, que proxectos desenvolve e a que destina os seus fondos.

Ademais de encontros de traballo, outro dos mecanismos que utilizará a Deputación para recibir as propostas da cidadanía serán os medios tecnolóxicos. Un dos recursos que usará será a súa páxina web: www.deputacionlugo.org, que, deste xeito, gaña cada vez máis importancia e é cada vez máis interactiva.

A Deputación de Lugo é a primeira galega e a terceira de España, despois de Málaga e Barcelona, que pon en marcha os orzamentos participativos. En España, esta experiencia está bastante estendida en Andalucía, Cataluña e País Vasco, pero na zona do noroeste do país apenas existen un par de experiencias. No conxunto de España hai medio cento de municipios que teñen orzamentos participativos.

Con este instrumento de participación, o Goberno provincial dá un paso máis no obxectivo que se marcou José Ramón Gómez Besteiro como Presidente da Deputación de Lugo: abrir a todos os veciños e veciñas da provincia esta institución, modernizala, e ser eficaces e transparentes.

Que non recorten a voz da xuventude

Ante as lamentables declaracións da Alcaldesa de Madrid, Ana Botella, en contra do rol das novas xeracións dos partidos, como militante das Xuventudes Socialistas de Galicia quero mostrar o máis profundo apoio ás organizacións xuvenís dos partidos políticos, así como a todo tipo de asociación xuvenil que traballa en construír unha sociedade máis participativa e democrática.

Deste xeito vemos como os gobernos do PP están atacando a democracia e a liberdade de expresión, porque non admiten criticas aos recortes que están realizando no Estado do Benestar. E nestes momentos difíciles que estamos a vivir é cando temos que defender, aínda con máis intensidade, o Estado do Benestar e opoñernos a calquera tipo de recortes en dereitos adquiridos pola cidadanía e que tanto nos constaron conseguir a todos e todas, como son os dereitos en educación, sanidade e servizos sociais. Por iso, debemos esixir que non recorten a voz da xuventude.

O labor da xuventude nos partidos é esencial para a rexeneración democrática destes, así como para facilitar a participación xuvenil na vida política e fortalecer a democracia. As organizacións xuvenís dos partidos políticos teñen unha gran función non só dentro dos partidos, senón tamén como escolas de cidadanía para unha gran cantidade de mozos e mozas. 

O artigo 48 da Constitución Española establece que: "Os poderes públicos promoverán as condicións para a participación libre e eficaz da xuventude no desenvolvemento político, social, económico e cultural". Un labor no que a xuventude temos que ter un rol activo e constante, xerando espazos propios para o debate e a participación.

Nestes tempos de crise e desprestixio das nosas institucións públicas, temos que reforzar aínda máis se cabe o papel dos mozos e mozas que altruistamente queren implicarse na construción da sociedade, aumentando o seu papel nos partidos políticos, nas asociacións xuvenís, nos consellos da xuventude, nas iniciativas cidadás, etc. En definitiva, débese reforzar a implicación da xuventude para afianzar así a nosa democracia.

Se só escoitas queixas ao teu arredor pero ninguén actúa, se cres que outro mundo é posible, se cres que podes achegar algo á sociedade, entón é hora de empezar a actuar. A través deste vídeo que comparto e da campaña realizada polo Consello da Xuventude de España podes descubrir diferentes formas de participar e implicarte na sociedade.

Que non recorten a túa voz. Non te botes atrás, hai multitude de opcións segundo os teus intereses e o teu tempo dispoñible. Anímate... Asóciate e actúa!

Fórmate en Verde

A Deputación de Lugo presentou o plan Fórmate en Verde, a través do que o organismo provincial creará emprego e fixará poboación no rural, pois dará formación e asesoramento técnico especializado, de maneira totalmente gratuíta, a un mínimo de 900 lucenses para que creen ou reconvertan empresas vinculadas á agricultura e á gandería ecolóxica, así como ó aproveitamento forestal sostible. A iniciativa conta con 1 millón de euros de orzamento, financiados ó 80% pola Unión Europea.

A Deputación arrancou coa captación dos beneficiarios do programa de emprego. Os interesados xa dispoñen tamén de toda a información sobre o programa na web provincial www.deputacionlugo.org. A inscrición abrirase a semana do 25 de febreiro e os cursos comezarán en marzo. Tódolos teñen capacidade limitada e as prazas cubriranse por rigorosa orde de inscrición. Desta oportunidade de futuro poderán beneficiarse un mínimo de 900 lucenses: desempregados, emprendedores, mozos, agricultores, gandeiros e estudantes de toda a provincia, excepto os censados no Concello de Lugo, pois son destinatarios doutros programas europeos.

O Presidente da Deputación de Lugo, José Ramón Gómez Besteiro, subliñou a urxencia de impulsar iniciativas de calado coma esta, ante a dramática subida do paro que se está a producir en Galicia e na provincia. Por iso a Deputación está comprometida coa creación de emprego, con medidas como o Pacto Provincial polo Emprego, ou as 150 becas para mozos e mozas. Fronte a este compromiso, o mandatario provincial lamentou que a Xunta de Galicia teña outras prioridades, pois mentres a Deputación fixo un gran esforzo aumentando un 63% os fondos para políticas activas de emprego nos Orzamentos deste 2013, a Xunta de Galicia, con 100 veces máis de presuposto, rebáixaos este ano nun 40%.

Paremos a Lei Wert

A Lei Wert supón unha completa involución, unha contrarreforma, que nos devolve ao pasado por implantar as reválidas, outorgar maior peso á materia de relixión católica e eliminar Educación para a Cidadanía. Ademais é inmoral segregar aos estudantes nas aulas mediante as reválidas que formula a reforma e rompe por completo a equidade na educación.

Esta lei primará claramente ao ensino privado e concertado sobre o público de calidade, subvencionará a centros que segregan ao alumnado por sexo, xerará conflitos nas comunidades con lingua propia, recortará a democracia nos centros, convertendo ao Consello Escolar nun floreiro, deixará tirados aos alumnos con dificultades de aprendizaxe e converterá aos estudantes de FP en man de obra barata.

O Ministro Wert trata de aprobar a súa Lei sen ningún diálogo e coa comunidade educativa en contra, e preferiu negociar antes o seu proxecto coa Conferencia Episcopal que cos pais, estudantes e profesores.

A Lei Wert e os recortes en educación realizados polo Goberno do PP rompen por completo o principio de igualdade de oportunidades que debe imperar na educación pública e supoñen desmontar dun plumazo décadas de consolidación da educación pública como principal instrumento de cohesión social.

A comunidade educativa, os cidadáns e cidadás, esiximos a retirada do anteproxecto da LOMCE, e reclamamos a elaboración dunha lei que naza do diálogo e acordo de todas as partes implicadas, xa que só así poderá gozar de garantías de estabilidade, tal e como acontece noutros países da noso entorno, e cumprir a función social que debe ter a educación.

#CancerEnLugo

Dende a Agrupación de Asociacións de Veciños de Lugo (AgrupaLugo) comezaremos este luns día 4 unha nova campaña nas redes sociais para reclamarlle á Xunta os servizos de Radioterapia e Medicina Nuclear no HULA, coincidindo co Día Internacional contra o Cancro. En AgrupaLugo decidimos realizar esta campaña despois do éxito que tivo nas redes sociais a campaña #InfartarEnLugo, coa que se reclamou a Unidade de Hemodinámica para o HULA.

Por este motivo poñerase en marcha esta campaña nas redes sociais para mobilizar á cidadanía lucense e solicitar estes servizos sanitarios no HULA, para que Lugo deixe de ser a única provincia galega sen dispoñer de Radioterapia e Medicina Nuclear.

Esta campaña denomínase #CancerEnLugo e pretende que a cidadanía se sume á petición de AgrupaLugo, reclamándolle á Xunta Radioterapia e Medicina Nuclear para o HULA. Deste xeito dende AgrupaLugo invitamos aos lucenses a compartir nas redes sociais a imaxe desta campaña e a difundir o hashtag #CancerEnLugo, xunto coas consecuencias de non ter Radioterapia e Medicina Nuclear na provincia de Lugo.

A imaxe e a información desta campaña poderán compartirse dende as redes sociais das que dispoñemos en AgrupaLugo, coa nosa páxina en Facebook: http://www.facebook.com/AgrupaLugo e co noso Twitter: https://twitter.com/AgrupaLugo.

Ademais dende AgrupaLugo e as asociacións integrantes participaremos na concentración para demandar a dotación dos servizos de Radioterapia e Medicina Nuclear no HULA. Esta concentración terá lugar o 4 de febreiro ás 17:00 horas diante da entrada principal do Hospital Universitario Lucus Augusti.

Ante a importancia deste asunto, dende AgrupaLugo animamos a tódolos veciños e veciñas de Lugo a que se sumen á petición de Radioterapia e Medicina Nuclear para o HULA, compartindo esta campaña nas redes sociais e asistindo á concentración prevista para este luns.

Dende AgrupaLugo non descartamos seguir realizando as accións que sexan necesarias ata conseguir dispoñer de Radioterapia e Medicina Nuclear no HULA. O obxectivo de todas as accións será sempre o de solicitar o maior número de apoios nun asunto prioritario para Lugo.

De cárcere a centro cultural

Están avanzando as obras que se están realizando no Vello Cárcere e coas que se converterá nun centro cultural. Trátase dunha obra moi importante para Lugo, xa que vai quedar no centro da cidade unha dotación cultural e social que lle vai dar un bo servizo ao centro e imos recuperar un edificio moi importante tanto a nivel urbanístico e histórico. Esta obra financiada polo Plan Urban está dividida en dúas fases debido á complexidade do proxecto.

As obras da primeira fase inclúen o patio do Vello Cárcere que se vai transformar nunha zona para exposicións e eventos, as antigas celas de homes que se situaban no espazo circular que dá ao patio, e as celas de mulleres que están nun módulo tralas celosías que dan ao patio central. Tamén se inclúe o módulo traseiro, que se destinará a estudo e exposición dos restos arqueolóxicos da cidade.

O proxecto para a segunda fase prevé a creación dunha zona de recepción, un punto de información, unha tenda de produtos relacionados con Lugo e coas exposicións que se fagan no novo Centro cultural. Tamén haberá unha pequena biblioteca e un auditorio con 137 prazas dotado con escenario, vestiarios e cabina de control. Este auditorio facilitará a organización dalgúns actos que agora se celebran no Salón de Plenos da Casa do Concello, como a presentación de libros, e tamén para audicións ou representacións, coa vantaxe do seu emprazamento no centro. Outro servizo co que se dotará ao edificio, aproveitando a súa proximidade ao Casco histórico, é unha cafetería con terraza e miradoiro que irá situada na última planta. 

O custe total do proxecto para a rehabilitación do Vello Cárcere, que se financia con fondos do Plan Urban, ten un presuposto de 4,6 millóns de euros. As achegas da Unión Europea, a través dos Fondos FEDER, da Deputación provincial e do Concello de Lugo fan posible acometer esta importante actuación que supón, xunto coa rehabilitación dun edificio emblemático da cidade, a creación dun centro cultural no centro histórico e tamén está a xerar emprego.

Lugo necesita Hemodinámica, Radioterapia e Medicina Nuclear

A Agrupación de Asociacións de Veciños de Lugo (AgrupaLugo) e todas as asociacións integrantes participararemos na concentración para demandar a dotación dos servizos de Hemodinámica, Radioterapia e Medicina Nuclear no Hospital Universitario Lucus Augusti e que terá lugar o 20 de xaneiro diante do Pazo de Feiras e Congresos.

Dende AgrupaLugo participaremos nesta concentración, porque estamos convencidos de que a cidadanía e os colectivos lucenses temos que reclamar uns servizos sanitarios que son tan necesarios para a nosa provincia, porque coa posta en marcha deste servizos aforraríase unha cantidade importante de diñeiro, atenderíanse aos pacientes nun menor tempo e en mellores condicións. E o máis importante sería que se reduciría o risco de falecemento.

Ante a importancia deste asunto, AgrupaLugo xa está a realizar unha campaña nas redes sociais que se denomina #InfartarEnLugo e coa que se busca reclamarlle á Xunta o servizo de Hemodinámica para o HULA. Hai que destacar a boa acollida que está a ter esta campaña e na que xa participaron numerosos lucenses compartindo o hashtag #InfartarEnLugo, xunto coas consecuencias de non ter Hemodinámica na provincia.

Ademais AgrupaLugo seguirá realizando as accións que sexan necesarias ata conseguir dispoñer destes servizos sanitarios. O obxectivo de todas estas accións será o de mobilizar á sociedade lucense e solicitar o maior número de apoios nun asunto prioritario para Lugo.

Deste xeito, dende AgrupaLugo preténdese que a cidadanía se sume a esta petición, reclamándolle á Xunta uns servizos sanitarios que son tan necesarios para a provincia. Ademais tendo en conta que Lugo é unha das provincias máis avellentadas, non só de Galicia, senón tamén de España, a dotación destes servizos aínda é máis necesaria se cabe.

Anímovos a tódolos veciños e veciñas de Lugo a que asistades á concentración que se celebrará o 20 de xaneiro ás 12:00 horas diante do Pazo de Feiras e Congresos.

#InfartarEnLugo

Dende a Agrupación de Asociacións de Veciños de Lugo (AgrupaLugo) criticamos que o Presidente da Xunta de Galicia e a Conselleira de Sanidade aínda non responderan á petición por escrito que lles fixemos e onde lles pedimos que cumpran a súa promesa de apertura da Unidade de Hemodinámica no Hospital Universitario Lucus Augusti.

Por este motivo dende AgrupaLugo puxemos en marcha unha campaña nas redes sociais para mobilizar á cidadanía lucense e solicitar a apertura da Unidade de Hemodinámica no HULA, para que Lugo deixe de ser a única provincia galega sen dispoñer dunha unidade deste tipo.

Esta campaña denomínase #InfartarEnLugo e pretende que a cidadanía se sume á petición de AgrupaLugo, reclamándolle á Xunta o servizo de Hemodinámica para o HULA. Deste xeito dende AgrupaLugo invitamos aos lucenses a compartir nas redes sociais a imaxe desta campaña e a difundir o hashtag #InfartarEnLugo, xunto coas consecuencias de non ter Hemodinámica na provincia de Lugo.

A imaxe e a información desta campaña poden compartirse dende as redes sociais das que dispoñemos en AgrupaLugo, coa nosa páxina en Facebook: http://www.facebook.com/AgrupaLugo e co noso Twitter: https://twitter.com/AgrupaLugo.

Ante a importancia deste asunto, dende AgrupaLugo seguiremos realizando as accións que sexan necesarias ata conseguir dispoñer de Hemodinámica no HULA, porque aforraríase unha cantidade importante de diñeiro, atenderíanse aos pacientes nun menor tempo e en mellores condicións. E o máis importante sería que se reduciría o risco de falecemento.

Dende AgrupaLugo tamén contemplamos realizar outras accións, entre as que figuran a de recoller sinaturas da cidadanía lucense, pedir entrevistas cos distintos grupos parlamentarios, coa Conselleira de Sanidade e co Presidente da Xunta de Galicia. O obxectivo de todas estas accións será o de solicitar o maior número de apoios nun asunto prioritario para Lugo.