10 anos como Patrimonio Mundial

Hoxe celebramos o décimo aniversario da proclamación da Muralla de Lugo como Patrimonio Mundial. Foi o 30 de novembro do 2000 cando tivo lugar un dos momentos máis importantes da historia moderna de Lugo: a concesión pola UNESCO do título de Patrimonio Mundial á Muralla Romana de Lugo. Esta distinción marcou un antes e un despois na forma de pensar dos lucenses, na autoestima e o orgullo dunha sociedade que avanzaba cara o século XXI.

Cúmprense 10 anos dese gran día, e queremos recuperar ese espírito de traballo en equipo, solidario e autoesixente, que naceu na cidade de Lugo. Con ese obxectivo naceu Lugo10, que representa a esa cidade dez, que avanza, que se moderniza, pero que mira cara atrás con orgullo. Lugo conta cunha poboación estraordinaria, sobresaínte, de 10, que recibe ao que chega sempre cos brazos abertos.

Lugo ten un potencial extraordinario en materia cultural, artística deportiva, histórica… Trátase dunha cidade bimilenaria que, entre outras cosas, conserva íntegro un monumento defensivo da que foi unha das capitais máis importantes do noroeste peninsular.

Este está sendo o ano de Lugo, o ano dos lucenses, o ano da Muralla, o símbolo cultural que une e reúne a todos e todas.

A nosa Muralla é 10, Lugo é 10!