Un cemiterio de interese histórico

O Cemiterio Municipal de Lugo, chamado Cemiterio de San Froilán, foi inaugurado en 1948. A obra, dirixida por Ruperto Sánchez, fíxose seguindo as liñas xerais do proxecto de Eloi Maquieira, un dos principais representantes da arquitectura racionalista en Galicia. Posteriormente foron trasladados aquí algúns panteóns e monumentos funerarios procedentes do antigo que data de 1858.

Nestes panteóns domina o estilo historicista que impuxera en Lugo o arquitecto Nemesio Cobreros. É tamén moi notable a cruz dedicada aos soldados das guerras de Cuba e Filipinas. Nos últimos anos realizáronse importantes obras, entre as que destaca o Xardín das Lembranzas. Milleiros de mortos xacen neste cemiterio, entre eles persoeiros ilustres que forma parte da memoria da cidade. Entre os persoeiros ilustres que descansan nel figuran Xoán Montes, Luis Pimentel, Ánxel Fole, Celestino Fernández de la Vega e Uxío Novoneyra.

Neste ano o Concello de Lugo deu un paso moi importante de cara á integración do cemiterio na vida social da cidade, coa organización de visitas históricas, buscando unha dimensión distinta do recinto que se proxecta á cidadanía como un lugar de repouso, de paz, de encontro persoal onde podemos descubrindo os seus recunchos a medida na que accedemos ao noso mundo interior.

Por todo isto recoméndovos que participedes nesta interesante iniciativa da Concellería de Servizos Xerais do Concello de Lugo e que descubrades a historia do Cemiterio Municipal de San Froilán. E quero rematar poñendo a continuación este fermoso poema, que podemos ler neste Cemiterio:

Podes chorar porque se foi,
ou podes sorrir porque viviu.

Podes pechar os ollos e rezar para que volva,
ou podes abrilos e ver todo o que deixou.

O teu corazón pode sentirse baleiro porque non a podes ver,
ou pode estar cheo do amor que compartistes.

Podes chorar, pechar a mente,
sentir o baleiro e virarlle as costas,
ou podes facer o que a ela lle gustaría:
sorrir, abrir os ollos, amar e seguir.

Anónimo